Covalima (RCCT) 17-06-25-Tinan ida ne’e prizaun Suai aprezenta lista indultu ho dadur na’in hitu (7) ba Ministeriu Justisa maibe hafoin aprezenta ba Prezidente Republika aprova deit dadur na’in ida (1) maka hetan indultu.
Diretor Prizaun Suai Rui Gonçalves, esplika konaba lista indultu ba dadur na’in-7 ne’e, na’in-2 aprezenta husi familia no na’in-5 seluk husi prizaun suai rasik.
“Ita hatene katak indultu sira ne’e bele aprezenta husi familia, advogado bele mos husi estabelesementu prizional, no husi Prizaun Suai nian aprezenta kondenadu na’in lima, sira bazeia ba idade no mos kazu ne’ebé tuir indultu nian, maibe prezidente aprova deit na’in rua ne’ebé maka aprezenta husi familia, ne’ebé iha tinan ida ne’e iha na’in-7 maka aprezenta husi servisu Prizaun Suai nian no na’in ida deit maka hetan aprovasaun husi na’i prezidente na’in-6 seluk lae” Diretór Prizaun Suai, Rui Gonçalves, dehan ba jornalista sira iha nia k’nar Prizaun Suai, Tabako Lot, Segunda (16/06).
Nia afirma husi prezu na’in nen ne’ebé la hetan indultu, Prizaun Suai sei buka meus atu nune’e tinan oin bele nafatin aprenta sira nia naran iha lista indultu nian.
“Sira na’in nen ne’ebé lae, ita sei kontinua nafatin iha loron bo’ot tuir mai, no oras ne’e daudaun dadur ne’ebé iha Prizaun Suai hamutuk ema na’in- atus ida rua nulu resin sia, kompostu husi kondenadu na’in 129 no preventiva na’in 17.” nia informa.
Enkuantu tuir dadus prizoneiru iha Prizaun Suai hamutuk ema na’in-129, kompostu husi bloku A ema na’in-40, bloku B-38, Bloku C-39 no Kuziña hamutuk ema na’in-12. Husi Numeru ne’e, prizaun kondenadu hamutuk ema na’in-112 no prizaun preventiva ema na’in-17. Portantu Prezeu na’in-129 ne’e mai husi Munisipiu Covalima Rasik ema na’in-54, Ainaro ema na’in-30, Bobonaro-25 no husi Manufahi ema na’in-20.
Jornalista : Julio Salinas
Editor : Chamot Nahac
