COVALIMA (RCCT) 14-12-23—Maske iha kalan no udan bo’ot profesional saude sira husi Sentru Saude Suai, nafatin iha fuan bo’ot hodi fahe informasaun ba komunidade iha suku Debos Aldeia lo’okeu, ho objetivu atu prevenesaun antes ba moras hada’et no moras la hada’et duke kona mak foin hanoin halo prevensaun.
Responsavel Programa Tuberkloze Sentru Saude Suai, Agustinho Amaral dos Santos, hatete Sosializasaun ne’e halo atu bele redus moras tuberkolize, problema saúde ba inan isin rua sira atu labele kontinua partus iha uma.
“Ami ekipa Sentru Saude Suai mai halo eventu kalan ho objetivu atu habelar informasaun saude nian kona ba moras da’et no moras la hada’et ba ita nia komunidade sira hodi redus moras ne’ebé akontese iha Postu Administrativu Suai, programa ne’ebé ami hato’o ba komunidade sira maka kona ba moras hada’et nian maka hanesan moras tuberkloze no problema saude ba inan isin rua sira labele kontinua partu iha uma maibe tenke halai lalais ba iha fasilidade saude sira ne’ebé besik hodi partus, iha atividades kalan ida ohin ne’e alende iha atividades kona ba moras hada’et, no mos moras la hada’et nian maka moras hipertensaun, asma no mos moras ran midar ka diabetes nian, tanba ne’e ho informasaun sira ne’e ami fahe fiar katak komunidade sira rona didiak nune’e mos sai haenesan informasaun baziku ba sira nune’e bainhira sira hetan sintomas karik bele lalais ba iha fasilidade saude ne’ebé besik hodi hetan tratamentu saude” informa Responsavel Programa Tuberkloze Sentru Saude Suai, Agustinho Amaral dos Santos, ba RCCT Kinta (14/12).
Xefe Juventude Lokeu Costodio Antonio apresia ho prezensa ekipa husi Sentru Saude Suai ne’ebé fahe informsaun konaba moras tuberkolze nune’e nia husu ba komunidade Lokeu atu kopera ho ekipa husi Sentru Saude tanba infromasaun ne’e konaba moras hada’et ne’e importante ba ema nia moris.
“Ha’u sente kontente tanba husi Sentru Saude Suai maske ho kondisaun klima udan bo’ot no kalan ona mos sira sei mai vizita komunidade Lo’okeu hodi fahe informasaun saude nian liliu ba inan isin rua, husu ba ha’u nia komunidade iha aldeia ida ne’e katak karik iha tempu ruma maka ekipa sentru saude sira mai ita hotu bele hakat mai hodi rona informasaun husi profesional saude sira, komunidade sira labele sente kolen atu rona informasaun importante liliu kona ba saude nian” nia dehan.
Reprezentante Komunidade Lokeu Rosita Soares, konsidera hatene informasaun konaba hases an husi moras tuberkoloze no inan isin rua sira labele kontinua partus iha uma ne’e importante.
“Sira husi Sentru Saude Suai hakbesik an mai iha ami nia fatin Lokeu ida ne’e, ami agradese tebes tanba informasaun ida ne’e fo mai ami atu bele hadok an husi moras tuberkloze, hases an husi inan isin rua sira labele kontinua partu iha uma atu nune’e ba lalais iha sentru saude sira ne’ebé besik ba komunidade” Rosita dehan.
Nune’e Responsavel Programa Tuberkloze Sentru Saude Suai, Agustinho Amaral dos Santos, husu komunidade sira bainhira hetan sintomas ruma konaba moras hada’et no la hada’et, tenke lalais ba iha fasilidade saude sira ne’ebé besik, labele ba uluk halo konsulta iha matan do’ok, atu nune’e pessoal saúde sira bele deteta sedu no tratamentu saude ne’ebé adekuadu no merese ba saúde di’ak ema nian.
Jornalista : Julio Salinas/ Moi Chung
Editor : Chamot Nahac
