Covalima (RCCT) 10-10-23–Durante loron rua nia laran hahu segunda no tersa ohin Comisaun Nasional Eleisaun (CNE) iha Munisipiu Covalima realiza formasaun ba Ofisial Supervizaun Eleitoral (OSE) hamutuk na’in-148 hafoin iha fulan kotuk CNE halo rekrutamentu ba sira.

Diretor CNE Munisipiu Covalima Hermenegildo de Sena, hatete objetivu husi formasaun ne’e oinsa atu eleva kapasidade ba Ofisial Supervizaun Eleitoral hamutuk na’in-148 ne’ebé sei destaka ba sentru votasaun iha kada aldeia iha Munisipiu Covalima hodi responsaveliza ba aktu eleitoral durante eleisaun ba lider komunitaria sira ne’ebé sei akontese iha loron 28 fulan ne’e.

“Molok atu koloka sira ba iha aldeia ka sentru votasaun, CNE ninia responsabilidade fo formasaun ba sira hodi nune’e buat ruma maka akontese iha sentru votasaun ka aldeia, sira duni maka sei toma responsabilidade ba aktu ne’ebé sira hasoru, tuir orientasaun ne’ebé ha’u hetan husi nasional katak formasaun ba OSE iha Munisipiu Covalima ho durasaun tempu ba loron rua, ha’u fiar katak formasaun ba loron rua ne’e sufsiente ona tanba Ofifial Supervizaun Eleitoral sira ne’e maioria ba ema tuan maka barak liu no ema foun uitoan deit” informa Diretor CNE Covalima Hermengildo de Sena ba jornalista sira iha nia knar fatin CNE Covalima.

Julmira Cardoso Goveia Leite nudar Ofisial Supervizaun Eleitoral, ne’ebe partisipa iha formasaun ne’e sente orgulhu basa bele haklean liu tan koñesimentu molok tun ba terenu hodi supereviziona iha eleisaun suku ne’ebé sei akontese loron 28 fulan Outubru tinan ne’e.

“Formasaun ida ne’e mai ami Ofsisial Supervizaun Eleitoral sira atu nune’e bele aumenta tan ami nia koñesimentu tun ba iha terenu tanba ami ba halo supervizaun tun ba terenu iha konsellu suku hodi bele tau matan no haree ba prosesu tomak liliu ba prosesu eleisaun suku ne’ebé sei akontese iha loron 28 fulan Outobru 2023, formasaun ne’e sufsiente maibe se bele aumenta tan ba halo loron 3 ou 4 hanesan ne’e nune’e bele aumentan tan koñesimentu klean liu tan kona ba eleisaun komunitaria nian” nia dehan

Entertantu formasaun hala’o iha salaun ba Dame CNE Covalima no maioria hetan partisipasaun masimu husi Ofisial Supervizaun Eleitoral iha Covalima hamutuk ema na’in-148 ne’ebe atu hodi responde ba eleisaun suku ne’ebe sei akontese iha fulan ida ne’e nia laran.