Covalima (RCCT) 27-03-25- Prezidente Republika Demokratika Timor Leste, Jose Manuel Ramos Horta halo observasaun ba iha Postu Saude, Aldeia Nikir, Suku Beiseuk ne’ebé hari husi oitavu governu, maibe komunidade la utiliza hodi halo tratamentu saude, tanba kondisaun edifisiu at total, aliserse uma refere nakfera hotu. Tanba ne’e, Prezidente Republika, Ramos Horta, husu ba Komisaun Anti Korupsaun (KAK) no Prokurador Jeral Republika (PJR) atu tun direta iha Suku Beiseuk hodi halo investigasaun.
Notisia Relevante : https://www.rcct.tl/abrao-nascimento-servisu-saude-municipio-covalima-sei-hari-tan-postu-saude-3-rezidensia-ba-mediku-no-edifisu-maternidade-iha-tinan-2022/
Ba Konstrusaun Postu Saude iha Suku Beiseuk, TIlomar, Oitavu Governu aloka orsamentu ho montante dolar Amerikanu rihun atus rua sia nulu resin lima, atus hitu ualu nulu resin lima, sentavus hat nulu resin rua ($ 295, 785.42), maibe povu Beiseuk la aproveita hodi halo tramentu ba sira saude tanba politika oitavu governu lideradu Primeiru Ministru Taur Matak Ruak, hatur edifisiu iha iha rai dodok leten ne’ebé hamosu erosaun (rai halai) efeta ba aliserse uma refere nakfera hotu.
“Komisaun Anti Korupsaun (KAK) no Prokurador Jeral Republika (PJR) to’o agora la halo buat ida, buka deit kee buat ne’ebé antigu, kuandu elementu CNRT ho PD nian ne’e sira badinas loos atu halo investigasaun mesmu tinan 10 liu tiha ona no buat ruma la vale buat ida, mais ida ne’e PJR no KAK loke investigasaun, ne’e grave, ne’e krimi ida grave, fraude kontra estadu no fraude ba komunidade iha ne’e, komunidade maka sai vitima, ema ki’ak loos la hetan oportunidade.” Prezidente Republika Timor Leste, Jose Manuel Ramos Horta, ko’alia ba jornalista sira hafoin halo vizita iha Beiseuk. Kinta (27/03).
“Tan ne’e ha’u ejiji PJR no KAK tenke mai iha ne’e hare, no ha’u hatete ba autoridade Covalima labele simu atu halo intrega, tanba ne’e fundu bo’ot ida, sentru saude ida ne’e hahu husi oitavu governu iha design no kontratu orsamentu besik 300 mill dolar, maibe ha’u lahatene se maka halo dezeñu, atu halo desizaun politika hari sentru saude ne’e di’ak, ita hare ba edifisiu nia design di’ak tebes maibe ikus mai komunidade la uza” Xefe Estadu ne’e fundamenta.
Administrador Postu Asministrativu (APA) Tilomar Venancio Sarmento, Governu da ualu finaliza ona obra maibe komunidade rihun tolu resin iha Suku Beiseuk la utiliza tanba impaktu husi dezastre naturais rai hala’i halo uma ne’e nakfera hotu.
Notisia Relevante : https://www.rcct.tl/postu-saude-beiseuk-ameasa-monu-impaktu-husi-rai-halai/
“Depois de sira halo hotu la konsege utiliza tanba hetan sobu husi inundasaun, ne’ebé to’o oras ne’e laiha kontinuasaun ba iha prosesu ida ne’e, maibe tempu ne’e daudauk ami relata ona ba iha parte governu atu bele mai identifika hodi bele hadi’a fila fali tanba povu Tilomar espesial ba iha Suku Beiseuk ema rihun tolu (3000) resin ne’ebé presija duni postu saude ida iha ne’e para sira bele konsulta iha ne’e, ami hato’o ona lamentasaun ne’e ba iha governu no sira haruka ona ekipa ida mai iha ne’e hodi hare kondisaun postu saude ida ne’e no sira husi tekniku Ministeriu Saude no MAE mai hare hodi konfirma ona ba iha Administrador Postu katak ba oin sei bele esforsu an bele konstrui fali, tempu badak nia laran sira mai ona survey atu bele atu halo foun fila fali, xefe aldeia ho xefe suku fo ona fatin seluk ba sira atu hodi hari postu saude iha Beiseuk” Administrador Postu Asministrativu (APA) Tilomar Venancio Sarmento, informa.
Lee tan : https://www.rcct.tl/povu-la-utiliza-postu-saude-postu-saude-beiseuk-tan-governu-hatur-iha-rai-dodok/
Hanoin hikas Iha Tinan 2021, governu Timor Leste liu husi Ministeriu Saude hatur planu liu husi Servisu Saude Munisipiu Covalima halo konstrusaun ba Postu Saude 3, rezidensia ba mediku, hari mos edifisiu maternidade iha Postu Administrativu Fohorem no Tilomar.
Hatuir ba planu ne’e, Servisu Saude Munisipiu Covalima konstrui Postu Saude iha Aldeia Nainare Suku Holpilat, Postu Administrativu Maukatar, Aldeia Nikir, Suku Beiseuk Postu Administrativu Tilomar no mos Postu Saude ida iha Suku Suai Loro Postu Administrativu Suai.
Notisia relevante: https://www.rcct.tl/abrao-nascimento-servisu-saude-municipio-covalima-sei-hari-tan-postu-saude-3-rezidensia-ba-mediku-no-edifisu-maternidade-iha-tinan-2022/
Jornalista : Julio Salinas
Editor : Chamot Nahac
