Covalima (RCCT) 27-12-23—Durante tinan barak ona Postu Saude Alas Tehen, Suku Fatumea, Postu Administrativu Fatumea, Munisipiu Covalima sei kontinua infrenta menus rekursu humanu no transporte hodi atende komunidade bainhira mai halo tratamentu saude iha postu saude refere.

Responsavel Postu Saude Alas Tehen Tarsicio Pires Amaral, ba jornalista sira iha nia kna’ar fatin hatete, Durante ne’e iha Fasilidade Saude Alas tehen iha deit Parteira na’in ida no Infermeiru Na’in no mos laiha Laboratoriu.

“Ami iha ne’e preokupa tebes liliu rekursu umanu menus, iha ne’e so iha deit infermeiru ida ho parteira ida, maibe parteira ne’e rekrutadu husi saude na familia ne’ebé hanesan parteira kontratadu infermeiru permanente so ha’u mesak, durante ne’e ami falladu liu iha ne’e mak ho programa nutrisaun tanba pesoal iha ne’e laiha ne’ebé ami araska tebes, formasista mos laiha, laboratoriu mos laiha, bainhira haree kona ba laboratoriu oinsa atu haree konaba ran nian ne’e provizoriu parteira mak atende, tan ne’e ami presija tebes pesoal ka rekursu oinsa atu bele mai reforsa iha postu saude ida ne’e,”Relata Responsavel Postu Saude Alas Tehen Tarsicio Pires Amaral.

Tarsicio Pires husu ba nonu governu atu hari rezidensia ba parteira no mediku sira ne’ebe destaka iha postu saúde alas tehen.

“konaba fasilidade iha postu saude ida ne’e di’ak, maibe ami husu deit atu governu liu husi Ministeriu saude harii residensia ba parteira ho mediku atu nune’e sira bele hela iha ne’e, tanba parteira ida agora daudaun hala’o knar servisu iha Suku Fatumea ne’e hela iha Suku Belulik Leten dader maka foin mai ne’ebé bainhira inan isin rua sira atu mai konsulta dala ruma sei hein tanba nia iha transporte bele mai lalais hodi atende inan isin rua sira maibe kuandu transporte laiha nia sei la atende inan isin rua sira ho lais no transporte laiha nia labele mai sa tan kalan ne’e at liu tan” informa Responsavel Postu Saude Alas Tehen Tarsicio Pires Amaral.

Tarsicio Pires dehan tan konaba Transporte atu utiliza hodi fasilita servisu iha Postu Saude Alas tehen iha motorizada ida deit, maibe dadun ne’e kondisaun at ona.

“Failansu bo’ot ida ba ami konaba transporte, iha duni motorizada ida maibe motorizada ne’e at ona, tanba momentu ne’e simu iha tinan 2013, ne’ebé ho atividade iha suku laran ami labele hala’o tanba motor laiha, ai moruk deit husi postu saude atu ba foti iha sentru mos araska agora aimoruk iha hela ne’eba atu ba foti maibe laiha transporte, tan ne’e husu ba ministeriu atu suporta netik transporte mai ami hodi bele hala’o servisu, bainhira komunidade moras ruma ami atu husi postu ba haree ne’e susar tanba la’o ain deit ita atu laba mos sala ita ba mos sala, kuandu ita la ba pasiente ejiji tenke ba haree ita ba lao ain atu lori motor mos motor ladiak” mia informa.

Enkuantu responsavele Postu Saude Alas Tehen ne’e rekomenda ba iha Ministeriu Saude atu tau planu hodi rekruta tan mediku no infermeiru ida tan, tanba iha Alas Tehen mediku laiha.