COVALIMA—-Kandidatura Prezidente Republika ba Periodu 2022-2027 Mariano Asanami Sabino, hatete politika relasaun internasional leno an ba ekonomia rai laran labele harii embaixada bar-barak halo saida ba Timor-Leste.
“Sai embaixador tenke leno an ba ekonomia rai laran, laos kria ona embaixada bar-barak maibe nianhalo saida ba Timor-Leste, ita tenke orgulhu ho ita nia embaixador sira, maibe tenke fo responsabilidade para hatama hodi investasi mai no buka investimentu iha rai liur hodi hatama osan mai Timor-Leste” Asanami hato’o asuntu ne’e liu husi komprimisu politik hafoin hala’o kampana politik iha Kampu Ladi Kamanasa, Suai (05/03).
Nia dehan sai embaixador tenke buka investimentu iha rai liur para estadu ida ne’e hodi investe setor publiku iha rai liur mos hodi hatama osan para funsionariu publiku sira nia osan, liliu ba.profesores sira nia osan, mediku sira nia osan, hasae polisia sira nia osan, hasae ferik katuas sira ni osan.
Asanami promete ba povu Covalima katak sai prezidente republika tenke hakbesik an ba povu laos povu hetan susar ka dezastre tuur nonok deitbiha paladin prezidente Aitarak laran hodi hateke deit ne’e labele.
“Ita sai ona prezidente kuandu povu hetan problema ruma tenke tun ba haree, ba haree povu sira ne’ebe faan ketupa iha dalan ninin sira ne’e, kuandu povu hetan dezastre ruma tenke tun ba haree hodi ajuda laos prezidente ida hein deit iha palasiu prezidente hodi simu deit infoasaun, tanba ida ne’e mak hau hamrik hodi kandidatu ba prezidente republika” nia dehan.
Nia afirma sai prezidente republika mos atu simplifika ukun ne’e katak ukun ne’e Maubere nian, konsepsaun maubere nian labele foto kopia fali husi Indonezia, labele leno ba Portugal labele leno an ba rai boot sira ne’e maibe Timor-Leste iha prinsipiu rasik, iha valor rasik no mos iha identidade rasik.(azu)
