COVALIMA(RCCT)19-01-23-—-Komandante Polisia Nasionàl Timor-Leste, Munisípiu Covalima, Superintendente, Basílio de Jesus, Hateten, polisia imigrasaun Kuarta (18/01) deporta fila fali sidadaun Indonezia na’in-1 hafoin tama mai iha area juridiku Munisipiu Covalima hodi hala’o atividade negosio ilegal iha fronteira no hetan kaptura husi Unidade Patrhulamentu Fronteira (UPF) no forsa F-FDTL ne’ebe destakadu iha fronteira Mota Masin Tilomar.
“Prontu atu dehan deit ba ita hotu katak horseik Kuarta feira dader ita deporta fila fali sidadaun Indonezia na’in-1 mai halo fali atividade negosio ilegal iha ita nia rai laran, ida ne’e hetan kaptura husi ita polisia fronteira no forsa F-FDTL destakadu iha Postu Administrativu Tilomar” informa Komandante Polisia Nasionàl Timor-Leste, Munisípiu Covalima, Superintendente, Basílio de Jesus, ba jornalista sira hafoin remata fo palestra ba estudante foun sira simu orientasaun iha Eskola Sekundaria Geral Publika Suai, Kinta (19/01).
Komandante PNTL Munisípiu Covalima Superintendente Basilio haktuir rai Covalima iha fronteira, tanba ne’e atividade ilegal iha fronteira kuaze akontese kada loron nunka lakon sempre iha, tantu akontese iha loron, akontese iha kalan.
Sidadaun sira ne’ebe halo atividade negosio ilegal iha fronteira ne’e entre sidadaun Timor-Leste no mos sidadaun Indonezia nia sempre halo atividade negosio ilegal iha fronteira.
“Tanba ne’e hanesan horseik sidadaun ne’ebe mai halo fali negosio ilegal iha ita nia rai laran, hafoin hetan kaptura husi UPF no Forsa F-FDTL destakadu iha Tilomar, bainhira hetan kaer ema sira ne’e komando munisipiu ninia dever iha obrigasaun halo prosesu inisiu depois ita hato’o ba iha Ministériu Públiku hanesan na’an ba prosesu, MP maka deside atu deporta ema ne’e sai fila fali ba nia rai orijin ou oinsa” komandante esplika.
Komandante afirma bainhira kaptura ona ema ne’e komando liga ho MP, MP dehan atu bele deporta ema ne’e liu husi dalan legal maka komando munisipiu mak entrega ba parte departamentu servisu imigrasaun, depois imigrasaun kontaktu ho imigrasaun Indonezia nian hodi entrega sidadaun ne’ebe halo aktu de krime iha Timor-Leste.
Basilio realsa sidadaun Indonezia ne’e tama mai iha area juridiku Munisipiu Covalima lalori passport maibe liu deit husi dalan ilegal.
“Klaru katak sidadaun ne’e kuandu tama mai ilegal nia lalori buat ruma tantu passporte maibe nia tama to’o iha ita nia rai laran hodi halo atividade ilegal, agora ita hetan tenke kaer hodi halo prosesu hotu ikus mai deporta fila fali ba nia rai moris fatin Indonezia” nia dehan.(Azu)
