Covalima (RCCT) 31-10-23–PNTL Covalima no Sub-Kram Covalima realiza enkontru koordenasaun ho Oraganizaun Arte Marsial iha Covalima hodi fo hanoin ba malu atu garantia hakmatek iha munisipiu Covalima relasiona ho selebrasaun finadu tinan 2023.
Tan Komandante Munisipiu Covalima Supintendente Calisto Gonzaga husu ba Lider Arte Marsial no Arte Ritual sira, kontrola hodi fo hatene ba membru sira atu labele uza atributu orgaun nian no sasan kontra bandu bainhira ba tau aifunan no sunu lilin iha rate hodi labele halo perturbasaun iha seniteriu,
“Ha’u presija forsa sira ne’ebé iha organizasaun para atu bele mai fo ideias ba malu, ideias ida ne’ebé ligasaun ho eventu ida ne’ebé mak mundu tomak selebra la’os ita Timor deit, laos ita Munisipiu Covalima deit maibe mundu tomak selebra kona ba loron santa no santo sira, hahu husi aban to’o depois tama fali ba loron finadu matebian sira nian hodi agradese katak matebian sira ita selebra ida ne’e hamutuk ho sira, saida mak lori hanesan lilin ho aifunan laos ba lori fali surik no lori fali pasta bo’ot farda organizasaun nian iha laran hodi ba hatais fali iha semiteriu laran, laos ita atu lori fali viola ba toka iha rate ne’e la autoriza” komandante dehan
Prezidente Sub Kram Covalima, Francisco Barros, konsidera juventude no membru Arte Marsial sira mos iha papel importante ba asuntu siguransa, nune’e alerta ba membru Arte Marsial no ritual sira atu bele kumpri regra sira ne’ebé iha ona.
“Atu halibur ita bo’ot sira hodi ko’alia konaba seguransa tanba seguransa ne’e iha ita hotu nia liman, tanba komandante ho membru sira mesak labele, maibe ita hotu tenke hamutuk atu fo liman ba malu fo seguransa ba iha loron boot ida ne’e” nia informa
Iha Ekontru Ne’e Gestor IKS PTL Covalima, Ruben do Rego Alves hato’o nia apresiasaun ba PNTL ne’ebé realiza enkotru hodi hametin linha koordenasaun entre arte marsial, hatudu sentidu katak estadu bo’ot liu organizasaun hotu iha nasaun ida ne’e.
“Ho enkontru ida ne’e bele kria ona mekanismu balu hodi hamosu lina kordenasaun entre arte marsiais katak organizasaun sei la boot liu estadu ida ne’e, hau apresia ho enkontru lina kordenasaun ida ne’e bele hamosu ona lina kordenasaun no atu bele konese entre lider ida ho lider ida atu bele koloka pensamentu ida ne’ebé maka atu esklui estadu ida ne’e bainhira problema ida presija komunikasaun efetivu ida hodi minimiza problema” nia hatete.
Enkontru ne’e hal’ao iha komandu PNTL Covalima, partisipa husi Lideransa Organizaun Arte Marsial no Grupu Arte Ritual sira mak eziste iha Munisipiu Covalima, Komandate eskuadra Suai no Maukatar inklui komandante operasaun, prezidente Sub Kram Covalima no mos Komanda PNTL Covalima Superintendente Polisia Calisto Gonzaga.
Jornlista :Julio Salinas
Editor : Chamot Nahac
