Covalima (RCCT) 06-05-25-Polisia Nasional Timor Leste (PNTL) hamotuk ho The Asia Foundation kapasita formasaun ba membru Konsellu Polisiamentu Komunitaria (KPK) Suku Kamanasa nune’e bele apoiu hodi redus no kombate kriminozu iha suku laran.
Reprezenta Komandante PNTL Munisipiu Covalima, atual Komandante Operasaun Covalima, Superintendente Asistente Polisia, Joãquim da Costa iha nia intervensaun hatete, iha futuru bele servisu hamutuk di’ak liu tan hodi fo seguransa ba komunidade tomak iha suku laran.
“Ita nia sorumutu ida ne’e atu ko’alia kona-ba oinsa maka ita bele hamutuk, ita servisu, ita kolabora, ita kopera liliu ita refere ba iha asuntu seguransa, liu husi programa ida ne’e atu bele involve ita bo’ot sira atu hola parte iha konsellu ida ne’e para bele hamutuk oinsa ita bele halo asaun liu husi programa ne’ebé maka ita halo ninia intensaun maka atu redus ka kombate asaun kriminalitas sira ne’ebé sempre mosu iha ita nia suku laran” deklara Reprezenta Komandante PNTL Munisipiu Covalima, atual Komandante Operasaun Covalima, Superintendente Asistente Polisia, Joãquim da Costa.
Xege Suku Kamanasa Fernando Noronha husu membru KPK sira atu servisu hamutuk ho parte hotu liliu ho Ofisial Polisia Suku (OPS) hodi fo seguransa iha Aldeia-4, Suku Kamanasa.
“Kuandu tama ona sai membru KPK ita hotu tenki servisu hamutuk oinsa atu haree iha ita nia Suku Kamanasa, liliu ba iha aldeia-4, Nafatin fo hanoin ba ita hotu katak importante liu maka tenke servisu hamutuk halo oinsa ita atu haree buat ruma iha ita nia suku, ita bele hodi redus buat balu ne’ebé durante ne’e mosu iha ita nia suku Kamanasa” informa Xefe Suku Kamanasa, Fernando Noronha.
PNTL Servisu hamutuk ho parseiru Dezenvolvimentu The Asia Foundation fasilita formasaun ba membru KPK Suku ho Vizaun no Misaun atu hametin relasaun entre polisia ho komunidade, prevene asaun krimime iha komunidade nia let.
Engkuantu formasaun ba membru KPK Suku Kamanasa hamotuk ema na’in 33 ne’e hala’o iha sede suku kamenasa durante loron hat hahu tersa feira no sei remata iha sexta semana ne’e.
Jornalista : Julio Salinas
Editor : Chamot Nahac
