Komandante PNTL Munisipiu Covalima Superientendente Polisia, Calisto Gonzaga

Covalima (RCCT) 13-09-23–Komando Polisia Nasional Timor Leste (PNTL) Munisipiu Covalima deteta ona sindikatu ne’ebé durante organiza malu halo movimentasaun hatama hatama sasan liu husi dalan illegal iha fronteira Covalima.

Komandante PNTL Munisipiu Covalima Superientendente Polisia, Calisto Gonzaga deskobre ba Jornalista sira iha nia k’nar fatin, Tersa (12/09) hafoin kaptura no hala’o prosesu inkeritu ba sidadaun na’in 4 husi Aldeia Lela, Suku Holpilat Postu Administrativu Maukatar ne’ebé komete kazu transaksaun tabako illegal, maka polisia kaptura iha bairo Fatulor, Suku Ogues, Tersa (12/09) Madrugada.

Aleide halo Aprensaun ba Sidadaun na’in4 uja motoriza 4 tula sigaru besik karton 6 ne’e, PNTL Munisipiu Covalima mos identifika hetan sidadaun na’in 2 ne’ebé sai ponte ba sigaru ne’ebé hatama illegal husi fronteira hodi fa’an iha merkadu Debos no Beko.

“Daudauk ita halibur ona evidensia maka sigaru ne’e rasik inklui motor 4 no telefoni 4, ho ninia kolega sira ne’ebé pronto atu bele fa’an sasan sira ne’e iha ema na’in rua, na’in ida iha merkadu Debos, Suai ohin ita mos bolu nia mai investiga ona no ida seluk mos hanesan ponte ba merkadu iha Suku Beko, sira na’in rua ne’e mak durante ne’e hanesan liman ain ka ema sira fa’an iha merkadu” Komandante PNTL Munisipiu Covalima Superientendente Polisia, Calisto Gonzaga, Esplika.

Komandante ne’e kontinua apela ba sidadaun sira ne’ebé hela iha lina fronteira labele involve ka komete kazu movimentasaun sasan kontra bandu iha lina fronteira liliu sigagu no presaun de arma inklui motorizada ho kareta, tanba ida ne’e prezudika sidadaun no mos kuandu kaer toma mak hetan sansaun hodi submete tuir prosesu legal.