.png)
Covalima (RCCT) 02-03-24-Komandante Polisia Nasional Timor-Leste (PNTL) Munisipiu Covalima Superientendente Polisia, Calisto Gonzaga, husu ba joven sira iha Aldeia Sanfuk, Suku Kamanasa, Postu Administrativu Suai, labele meta problema nune’e hodi hafoer naran iha regor kriminal.
Komandante Calisto dehan lia ne’e relasiona ho akontesimentu dia 24 kalan foin lalais ne’ebe mak grupu deskonesidu tuda rahun komunidade nia uma sia no motorizade 1 at total. Nune’e komandante ne’e deklara sei halo kapturasaun ba joven na’in ne’ebé alista ona deskunfia sai autor ba aktu brutalizmu ne’e.
“Ha’u fiar iha Sanfuk, Dais sempre iha problema la’os ema estranjeiru nasaun keta-ketak maibe timor oan hotu aldeia maka difirente, suku maka diferente maibe ita Suai ona hotu, ha’u enkoraza oportunidade ba ita koresma ida, ba juventude sira ne’ebé naran iha ha’u Xisto, Rosito no Janu sira na’in tolu ohin la hola parte iha sorumutu ida ne’e tanba moe, ne’e tanba nia sala, ha’u sei kaer nia, ita ko’alia buat ketak ida ha’u kaer nia, nia forsa sei la liu forsa estadu, parese laiha ne’e ha’u sei buka nia iha Dais, aproveita oportunidade ida ne’e komandante Eskuadra Maukatar iha, ne’ebé Dais nia parte kontrola husi eskuadra Maukatar nian ne’e iha Suku Belekasak, ha’u tenke ko’alia ho sira semana oin, ha’u tama fali iha ne’eba, ita ko’alia hanesan maun alin, ko’alia hanesan familia ita ko’alia para labele repete labele halo tan problema ikus mai povu maka sai vitima” Komandante Polisia Nasional Timor-Leste (PNTL) Munisipiu Covalima Superientendente Polisia, Calisto Gonzaga, kasu lia hirak ne’e hafoin iha Sesta feira (02/03) ne’e hala’o dialogu ho komunidade Aldeia Sanfuk relasiona ho akontesementu iha loron 24 fulan Fevereiru 2024 madrugada grupu deskonesidu tuda rahun uma 9 no motorizada ida rahun total iha Sanfuk.
Nune’e Komandante Calisto apela ba foinsa’e sira atu kuaidadu saude no fisiku, labele mete problema tanba governu sei halo rekrutmanetu ba membru polisia foun iha tinan ida ne’e.
“Prepara imi nia an labele hemu tua, labele halo problema imi nia naran rejista iha regor kriminal, para ba kompete ho juventude sira seluk, ba sira ne’ebé idade ona ita sei la rekruta tanba ita hakarak rekruta ema ne’ebé idade minimu idade 18 to’o 23 anos ne’e ba mediu soldadu, ita sei rekruta mos ofisial atu dirije ba instituisaun ida ne’e maka ita bele halo foti ema hotu nia kontribuisaun ba estadu ida ne’e, se maka rona ida ne’e prepara imi nia an, joven sira ne’e mak tur iha estrada ibun sira ne’e prepara imi nia an, komportamentu ka hahalok di’ak para nune’e kuandu ita kompete ba iha testu ida ne’e ita bele ba” Komandante PNTL Munisipiu Covalima, uperientendente Polisia, Calisto Gonzaga, hakotu.
Entretantu akontesementu iha loron 24 fulan Fevereiru 2024 madrugada grupu deskonesidu tuda rahun komunidade nia uma 9 no motorizada 1 rahun total iha Sanfuk.
Jornalista : Julio Salinas
