.png)
Covalima (RCCT) 03-04-24-Relasiona postazen iha sosial media facebook iha loron 27 fulan marsu foin lalais, ne’ebé hatete “Polisi tranzitu (Poltraz) Covalima nia meus chek point rekolla osan direta no selu iha banku, Hanesan Sidadaun timor oan senti triste,, ema nia dokumentu kompletu mos tenki fo osan? Triste tebes… tenki fo sasin”
Relasiona ho lamentasaun ne’e, Komandante Polisia Nasional Timor-Leste (PNTL) Munisipiu Covalima Superientendente Polisia, Calisto Gonzaga, hatete polisia hala’o ninia servisu tuir lei ne’ebé iha. Tan ne’e komando polisia covalima orienta ona membru na’in 3 atu halo denunsia konaba sidadaun balu la kontenti konaba atentementu publiku ne’ebé polisia tranzitu halo iha covalima np tempu badak sei bolu sidadaun refere hodi submete ba investigasaun.
“Ita iha ona orientasaun ita nia membru na’in-3 ne’ebé hato’o ona informasaun, para atu bele hato’o nia denunsia katak iha sidadaun balun ne’ebé maka ladun kontente ho atendimentu publiku ba membru polisia tranzitu nian iha ne’e, ita halo tuir lei ona, ita fo bilete infrasaun ba dokumentus mate ne’e, ita fo ona iha fulan rua liu ba ne’e, akontese iha 8 de Fevereiru, mais nia mai nafatin seidauk renova, ne’e kona nafatin ne’ebé labele hanoin dehan katak nia selu ona iha tinan kotuk ka fulan kotuk ka ne’ebé nia uza estrada publiku ne’e ho nia direitu tomak ne’e lae, hotu-hotu regras iha ita bele tuir, ita iha obrigatoriu para atu bele fo sansaum ne’ebé maka nafatin repetir nia uluk halo nia repete nafatin tan ne’e ita nafatin fo koima ho montante $ 10.00 to’o $ 20.00 ne’e maka ita nia sidadaun ne’e komen hela, mas ha’u hanoin ida ne’e mos ofende ema seluk, nia labele hanoin katak nia maka iha direitu atu ko’alia ema ida mais ema seluk inklui instituisaun estadu, ne’ebé hato’o ona informasaun ne’e ita hato’o ona denunsia ba investigador no tempu badak sei bolu hela nia” dehan Komandante PNTL Munisipiu Covalima.
Sidadaun, Elvis da Costa Lopez, ne’ebé iha loron 27 fulan marsu 2024 lansa nia postazen iha sosial media facebook, kestiona konaba servisu polisia tranzito Covalima, informa ba RCCT kuarta Feira (03/04) via telefone dehan hanesan kareta na’in nia duvida tanba polisia la fo resivu ruma ba motorista sira atu lori osan ba selu iha banku maibe selu direita ba polisia iha fatin chek point.
“Ha’u nia duvida maka ne’e, hau la dun maibe hakarak atu hatene tuir de’it osan sira ne’e to’o iha banku ka lae ne’e primeiru, segundu kuandu osan sira ne’e to’o iha banku ami atu ba chek lori saida, loloos ne’e sira tahan tiha ami hanesan ne’e polisia tranzitu tenke fo surat tilang ida ba ami katak ami selu ona para ami la’o ba oin polisia halo chek pont tan ami bele hasai surat tilan ne’e dehan ohin ami kona ona tilang ne’ebé ami selu ona, maibe surat tahan tebes mos ami laiha, tanba iha momentu ne’eba kondotor lori kareta fila mai to’o iha Zumalai polisia tahan tan ami iha ne’eba husu surat tilang maibe motorista ne’e hatan ba polisia sira iha Zumalai katak ami hetan ona tilang husi tranzito sira iha Suai ne’ebé ami selu ona maibe sira la fo surat tilang” dehan Elvis da Costa Lopez via telefonin ba RCCT Kuarta (03/04).
Entertantu Elvis da Costa Lopez nudar sidadaun Timor oan ida ne’ebé durante ne’e hala’o atividade fila liman liu husi sosa karau iha munisipiu lori ba fa’an fali iha kapital Dili, maibe iha loron 27 fulan Marsu 2024 hafoin ninia motorista lori kareta halo viazem husi Dili mai Suai atu liu ba sosa karaun iha Salale to’o iha dalan k’laran hetan polisia tranzito Covalima halo pasarevista (Check point) iha momentu ne’eba polisia la fo resivu ruma ba motorista sira atu lori osan ba selu iha banku maibe selu direita ba iha polisia.
Jornalista : Julio Salinas
Editor : Chamot Nahac
