Covalima (RCCT) 12-05-25 Polisia Nasional Timor Leste (PNTL) lakon ona membru di’ak ida ho naran Clementino Soares, ho diviza Sarjentu Xefe, ne’ebé durante ne’e servi instituisaun PNTL iha komandu Munisipiu Covalima hahu husi 2001 ate remata nia pregrinasaun moris iha mundu iha loron 09 fulan Maiu tinan 2025 hafoin sofre moras komplikadu. Prosesu funebre saudozo Clementino Soares hahu ho misa iha saudozo nia rezidensia iha Suku Suai Loro, Postu Administrativu Suai, hafoin kontinua kedas transporta saudeozo nia isin mate ba komandu PNTL Covalima hodi presta omenazen nudar Saudozu nia vizita ikus iha ba fatin servisu, hafoin familia, kolega servisu no parente sira lori sadozu Clementino ba halot iha semeterio publiku Suai Loro.
Iha Prosesu funebre ne’ebé responsabeliza husi komandu PNTL Covalima ne’e, Komandante Munisipiu Delega Munisipiu, delega Superintendente Asisten polisia Joaquim da Costa, rekuñese lakon ofisiais polisia ida, durante ne’e fo ninia dedikasaun tomak hodi servisu estadu liu husi instituisaun PNTL iha komandu Covalima.
“Komandu ida ne’e le sai ona ba ita bot sira ho tempu naruk tebes ne’ebe nia dedika an ba rai timor leste liliu ba iha komandu Munisipiu Covalima, sakrifika an iha situasaun ne’ebé deit no saudozu, Sarjentu Xefe, Clementino, ema ne’ebé maka servisu di’ak no nia prontu atu hala’o orden iha kualker tempu ne’ebé mai husi komandu Munisipiu Covalima. Komandu Munisipiu Covalima mos senti triste, lakon tebes nia membru ne’ebé mak di’ak.” Superintendente Asisten polisia, Joaquim da Costa, dehan.
Saudozu Clementino nia kaben, feto faluk, Juleta Rika konta sain dehan durante ne’e ninia laen Clementino Soares sofre moras komplikadu nune’e familia lori saudozu ba halo tratamnatu iha ospital referal suai, maibe la konsenge rekopera, tan ne’e familia disidi lori saudozu ba halo tratamentu iha Ospital Nasional Guido Valadares, Dili.
“Ha’u lori nia ba ospital suai, baixa emerjensia, pois ne’e hotu fila mai uma, pois nia to iha uma, nia isin manas nafatin ho is bot. Moras makas no komesa la han ona entaun ha’u lori ba fali ospital dotor sira detekta fuan bubu, sira fo aimoruk fila fali mai nia nafatin deit ho isin manas is bot kontinua, entaun ha’u buka fali aimoruk tradisional konaba is bot nian, kontinua fali ho isin manas, la han, entaun ha’u aluga kareta ami rua ba Dili halo tratamentu iha dili iha klinika Maria, ba primeiru sira hare dehan nia moras infeksaun ba inpedu ho nia aten, entaun sira fo aimoruk hemu depois sira tau infus. Pois semana ida ami ba fali fo ai moruk maibe nafatin la han, depois dotor sira husi klinika maria fo karta ruzukan ba iha Hosptal Guidu Valedares to’e iha ne’eba sira halo diskopi no hatama mangera ho leno laran hetan tan fali moras aten atu simu hahan nian ne’e infeksi, ne’e hotu sira fo ai moruk maibe nafatin la han no nia mos iha moras seluk tan to’o hakotu nia is deit” Juleta Rika, Konta.
Entretantu saudozo Clementino Soares moris iha Suku Ohoana Kailako iha loron 01-08-1971. Saudozu oan dahuluk husi maun alin na’in tolu, husi Aman Manuel Soares no Inan Filomena Soares, Saudozu hahu sai membru Polisia Nasional Timor Leste (PNTL) iha tinan 2001 to tinan 2025, Saudozu hakotu ninia pregrinasaun husik hela nia fen kaben no oan na’in 4 kompostu husi feto 1 mane nain 3.
Jornalista : Alfredo Barreto
Editor : Chamot Nahac
