COVALIMA (RCCT) 14-12-23—Kumpri desizaun governu, Komandu Polisia Nasional Timor-Leste (PNTL) Munisípiu Covalima halo patrulamentu iha tempu kalan konsege kaptura sidadaun na’in-4 ne’ebé sunu fugetes ka petasan iha tempu kalan.
Komandante PNTL Munisípiu Covalima Superintendente Polisia Calisto Gonzaga, hatete hafoin polisia kamptura sidadaun nain 4, Komandu PNTL Covalima submete kedas ba Prosesu investigasaun, maibe geografikamente komandante ne’e la temi Komunidade na’in hat ne’e nia naturalidade.
“Hori kalan ita kaer ona lori sira mai halo investigasaun hodi husu ba sira katak se maka fa’an ba sira, ema ne’e simu husi ne’ebe mak nia bele fa’an iha loja ne’ebe ita fo sansaun, hori kalan ita kaer ona ema nain-4 ou na’in-5 ida hanesan ne’e halo investigasaun atu bele husu tanba sira ne’ebe ita identifika ne’e ema sira ne’ebe sunu bele nia maka prepara ou bele nia hola, kuandu nia hola husi ne’ebe, maibe iha informasaun ona katak iha loja balun maka fa’an” dehan komandante ba jornalista sira iha nia kna’ar fatin Komando PNTL Munisípiu Covalima Tersa (12/12/23).
Komandante ne’e haktuir governu bandu komunidade labele sunu fugete nune’e labele fo oportunidade ba ema deskonesidu lansa tiru arma.
“Ita hanesan sidadaun ida ne’ebe diak toma ida ne’e ita tenke husik, kuandu ema autoridade ida hatete katak ida ne’e providu konserteza laos nia hakarak atu proividu maibe ne’e tanba estadu nia ordem atu limita ita nia asaun sunu fugetes sira ne’e, para atu labele ema at sira aproveita tiru ba tiru tanba ne’e mak ita kontrolu, ne’e rejime komplementares atu bele proividu, mas iha tempu natal 24 kalan depois misa foin bele sunu paison nune’e mos iha dia 31 atu troka loron ano novu nian ne’e ita bele halo mas iha loron sira seluk ita labele halo tanba atu bele hapara situasaun iha tempu adventu ema hotu kalma atu bele halo orasaun, halo karidade vizita familia tan ne’e mak estadu proividu uitoan iha periode tempu badak maibe pelumenus lao diak, tan ne’e mak hori kalan komesa ona menus ema sunu fugetes maibe ita nafatin fo hanoin liu husi media sira liliu ba ita nia oan sira ladun asesu ba informasaun ida ne’e ita sei tenta fahe informasaun liu husi polisiamentu komunitaria hodo informasaun ba komunidade katak atu bele proividu iha tempu adventu ida ne’e, tempu Dezembru ida ne’e, tempu tinan foun ida ne’e para atu bele sunu paison” nia haktuir.
Entertantu Komandante PNTL Munisípiu Covalima Superintendente Polisia Calisto Gonzaga, husu ba komunidade tomak iha Munisipiu Covalima liliu ba inan no aman sira labele haruka oan sira sunu paison ka petasan iha tempu adventu ida ne’e, karik sunu fugetes maka polisia sei kaer, iha biban ne’e komandante ne’e dehan tempu ba komunidade atu sunu fugetes iha dia 24 kalan no 31 dezembru kalan, maibe ba loron baibain labele sunu fugetes.
Jornalista : Julio Salinas
Editor : Chamot Nahac
