COVALIMA—-Komando Polísia Nasionál Timor-Leste (PNTL) Munisípiu Covalima, liu husi Unidade Patrilhamentu Fronteira (UPF) kaptura sidadaun joven na’in-4 ne’ebe halo transaksaun ilegal ba sigaru Black ARROM no tabako sek hamutuk Saku 18 iha lina fronteira Mota Masin Salele, iha loron sabadu (21/01) foin lalais ne’e.
Komandante PNTL Munisípiu Covalima Superintendente Basilio de Jesus, Hateten, oras ne’e daudaun komando liu husi Seksaun Investigasaun Kriminal Munisípiu Covalima halo intervista ba sidadaun sira ne’ebe hatama sigaru, molok kazu ne’e entrega ba iha Ministériu Públiku,.
“Ohin ita kontinu halo prosesu ba sira na’in-4 inklui kondotor ho ninia ajudante (konjak) ne’ebe tula sasan sira ne’e, tan ne’e ohin ita halo investiga ba sira hamutuk na’in-6, ne’ebe sira ne’e involve hala’o atividade ilegal hodi hatama sigaru Black ARROW ho tabako sek husi Fronteira Tilomar, tama mai iha Aldeia Wataba, Suku Beiseuk, Postu Administrativu Tilomar, iha Zona Has Lot entre Postu UPF 55 ho Postu UPF Wee Sei nia let” informa Komandante PNTL Munisípiu Covalima Superintendente Basilio de Jesus, ba jornalista sira iha nia kna’ar fatin PNTL Munisípiu Covalima Tersa (24/01).
Komandante afirma ohin parte seksaun investigasaun Kriminal Munisípiu Covalima nian halo intervista ba sira antes atu kontinua ba iha Ministériu Públiku, agora saida maka sai evidensia ba buat sira ne’e mak iha sira na’in-4, kondotor ho nia konjak, kareta microleta ida lori tula tabako hamutuknsaku 18.
Iha saku 18 kompostu husi tabako sek hamotu saku 16 no sigaru Black ARROM hamutuk Saku 2, sigaru no tabako sek lubuk ida maka sira hatama, ne’ebe agora daudaun iha ona sela PNTL Munisípiu Covalima, destruction de ida ne’e komando sei enkamina fila fali sasan sira ne’e ho sira na’in hirak ne’e ba iha Ministériu Públiku halo kontinuasaun.
Normalmente prosesu ida ne’e mak lao tanba MP mak sai na’in ba prosesu hot-hotu, maibe polisia sei la hakotu prosesu tantu atu ki’ik ka boot ne’ebe sei la hakotu iha nivel polisia, polisia sei enkamina ba iha MP hodi halo prosesu kontinuasaun.
Kimandante afirma Covalima iha fronteira ho Indonezia, postu 4 mak iha fronteira hanesan postu iha Tilomar, Fatumea, Fohorem no Fatululik inklui mos Maucatar.
“Ita ko’alia kona-ba atu regula atividade ilegal iha fronteira ida ne’e, ita Covalima iha fronteira ho Indonezia, ita nia postu-4 mak hanesan primeiru mak postu Tilomar, Fatumea, Fohorem, Fatululik inklui Maucatar, maibe husi postu ne’ebe temi kuaze husi postu Tilomar maka as tebes ba transaksaun ilegal ne’e kuaze akontese kada loron hala’o ilegal mina, manu, motor ho mos sigaru ne’e kuaze lor-loron deit ne’e as liu husi Tilomar” nia esplika.
Komandante sublina kada semana sempre simu ilegal sira ne’e mai husi fronteira ne’ebe hetan kaptura husi UPF, hetan kaptura husi F-FDTL ne’ebe destakadu iha Tilomar, ne’ebe atividade ida ne’e kada semana la falta.
Nia dehan UPF ho F-FDTL halo ona meus oi-oin tenta atu halo oinsa maka atu minimiza, oinsa maka atu halakon ou atu kaer ema sira ne’e, maibe ema sira ne’e nafatin kontinua lori tabako tama sai liu husi dalan sira ne’ebe durante ne’e sira uza hodi hala’o atividade ilegal.
“Ita nia forsa ho ita nia UPF iha ne’eba halo movimentu patrolia nunka toba durante oras 24 nia laran, ida ne’ebe ita hetan ita kaptura, maibe sira ne’ebe la hetan tama to’o iha vila laran maka foin hetan hodi halo kaptura ba sira lori mai entrega iha komando munisipiu” nia dehan.
Nia haktuir prevensaun maka servisu polisia ne’e, servisu polisia kuaze iha UPF ho F-FDTL iha posti fronteira ne’eba hodi halo kontrolu seguransa iha lina fronteira, hanesn ema hotu hatene husi postu ida ba iha postu ida distansia kilometru dook tebes, hanesan Postu UPF 55 ba postu UPF Wee Sei ninia distansia kuanze kilometru 7-8, tanba ne’e sidadaun sira uza oportunidade ida ne’e hodi lao livre tama sai lina fronteira tanba aproveita husi postu ida ba postu seluk ne’e distansia dook tebes.(Azu)
