COVALIMA—-Komandante Polisia Nasionàl Timor-Leste (PNTL) Munisípiu Covalima, Superintendente Polísia Basilio de Jesus, informa iha tinan kotuk PNTL sosializa ona lei kontra bandu ba komunidade sira iha lina fronteira ho objetivu ida atu halo prevensaun ba sidadaun sira gosta lao tama sai fronteira liu husi dalan ilegal.
“Hau hanesan komandante munisipiu, hau mos halo ona atividade ida hodi sosializa kona-ba lei kontra bandu iha lina fronteira, sosializasaun ne’e hala’o iha fulan Agusto no Novembru tinan tinan kotuk, ne’e ita lao komesa husi fronteira Tilomar to’o Fatumea, ita hato’o ba populasaun sira ne’ebe hela iha lina fronteira oinsa atu ko.prende kona-ba lei kontra bandu iha fronteira” informa Komandante PNTL Munisípiu Covalima, Superintendente Polísia Basilio de Jesus, ba jornalista sira iha nia kna’ar fatin komando PNTL Covalima, Santa Rosa Tersa (24/01).
Komandante afirma, ida ne’e maka meus polisia halo prevensaun ho modelu sira hanesan ne’e, polisia hakbesik ba iha komunidade hodi ko’alia ba sira kona-ba lei kontra bandu fronteira.
Polisia ko’alia ba komunidade sira hanesan sidadaun ida atu kontribui ba estadu, laos tenke halo atividade ilegal hodi kontra lei, maibe tenke halo atividade ne’ebe legal atu nune’e hodi fo mos rendimentu ba estadu, ida ne’e mak polisia sempre hato’o ba sira atu komprende no hatene sai sidadaun ida ne’ebe diak hodi kontribui ba nasaun.
Komandante hateten atu redus numeru ilegal sira ne’e maka dalan ida liu husi sosializasaun ne’e, parte ida mos fila fali ba sentidu nasionalismu husi povu sira liliu husi joven sira, tanba involvimentu iha atividade ilegal ne’e barak liu joven mane sira, kuaze feto sira menus liu partisipa iha atividade ilegal iha lina fronteira ne’e.
Komandante afirma hanesan Timoroan tenke iha sentidu nasionalismu hodi hakribi hahalok ilegal sira ne’e, para nune’e hodi kontribui ba estadu ida ne’e, ida ne’e maka polisia halo liu husi sosializasaun ba komunidade sira ko’alia kona-ba lei kontra bandu.(Azu)
