COVALIMA—-Xefe Departamentu Komunikasaun Sekretaria Tekniku Programa Nasionál Dezenvolvimentu Suku (PNDS) Nasional Pedro Cachola Hateten, objetivu husi sosializasaun ida ne’e ba autoridade sira iha Munisípiu Covalima, tanba programa ida ne’e rasik halo ona revizaun programa operasaunmanual iha dekretu lei No.8/2013 hodi ko’alia kona-ba programa PNDS nian.
“Hakarak hatete ba programa ne’e rasik ita halo ona revizaun pela primeiru ves, ita halo ona trazisaun ba iha programa operasaun manual ne’ebe mak iha dekretu lei No.8/2013, mai ho dekretu lei ida ne’ebe mak ko’alia kona-ba programa PNDS nian, ba tinan ida ne’e governu liu husi Ministeriu Administrasaun Estatal hamutuk asesor internasional sira hamosu tan dekretu lei ida iha dekretu lei 94/2022 iha 28 Novembru halo alterasaun da haat ba iha programasaun manual PNDS nian” informa Xefe Departamentu Komunikasaun Sekretaria Tekniku Programa Nasionál Dezenvolvimentu Suku (PNDS) Nasional Pedro Cachola, ba jornalista sira hafoin remata halo sosializasaun mata dalan dekretu lei No.8/2013, ba autoridade lokal sira ne’ebe hala’o iha salaun Administrasaun Munisípiu Covalima Sesta (24/02).
Nia afirma, foin pela primeiru ves halo revizaun ba iha mata dalan programa operasaun manual PNDS nian komesa kedas iha 2013, maibe to’o 2023 ne’e mak foin pela primeiru ves halo revizaun ba mata dalan ne’e rasik.
Tuir Xefe Departamentu Komunikasaun Sekretaria Tekniku Programa Nasionál Dezenvolvimentu Suku (PNDS) Nasional Pedro Cachola katak presija halo revizaun ba mata dalan, tanba akumula hotu durante iha tinan 2013 PNDS hahu la’o ona faze normal mai ne’e hetan kritika barak, rekomendasaun barak husi komunidade, tanba programa PNDS nian ne’e tun direita ba iha komunidade.
“Ho rekomendasaun hirak ne’e akumula hamutuk .aka ita foin halo mata dalan bazeia ba sira nia rekomendasaun ne’ebe ita akumula hamutuk iha momentu ita tun ba sosializasaun iha nivel aldeia ka implementa programa PNDS nian iha nivel aldeia” nia afirma.
Nia afirma mata dalan ne’e revee liliu livru ba programa operasaun manual ne’e rasik, nia mekenismu ba iha identifika benefisiariu sira no fundus ne’ebe aloka ba iha nivel suku no aldeia, ko’alia mos ba iha Uma Naroman ba Povu (UNP), ne’ebe tinan kotuk naran Uma Kbi’it La’ek (UKL) agora nakfilak ba UNP bazeia ba dekretu lei No.94/2022 tanba ida ne’e maka kria iha mata dalan programa operasaun manual ba programa PNDS regular ida ne’e maka mai halo sosializasaun ne’e ba iha nivel munisipiu.
Nia dehan ba tinan ida ne’e la’o serentak, maibe ba iha Munisipiu Baukau horseik foin remata, maibe ba Munisípiu sira seluk lao hotu ona, so munisipiu Oekusi no Atauru sei dauk maibe neneik sei tau hotu iha planu atu halo sosializasaun iha ne’eba hotu.
Administrador Munisipiu Covalima Francisco de Andrade, afirma sosializasaun ne’e signifika katak atu hatene klean liu kona-ba mata dalan PNDS nian.
“Sosializasaun signifika katak iha buat foun bainhira ita sei dauk hatene, tanba ne’e maka loron ida ohin bolu xefe suku, Administrador postu ho ekipa PNDS nian atu nune’e hodi rona rasik, tanba ida-idak ho nia kna’ar serbisu la hanesan, xefe suku nia kna’ar iha PNDS ne’e mak saida, administrador postu nia kna’ar iha PNDS ne’e mak saida, no administrador munisipiu nia kna’ar iha PNDS ne’e mak saida” informa Administrador.
Administrador dehan orsamentu ne’ebe aloka mai iha Covalima besik besik $ 6 millaun, husi orsamentu ida ne’e ba iha ne’ebe, maibe osan sira ba hotu iha suku, sei dauk konta mos apoiu husi governu Australia” nia dehan.
Administrador husu xefe suku no administradór postu sora atu intende didiak mata dalan ne’ebe fo dalan atu lao tuir.
Entetantu sosializasaun nivel munisipiu ne’ebe hala’o iha Covalima hetan partisipasaun masimu husi Administrador Munisipiu Covalima Francisco de Andrade, administrador postu 7, xefe suku 30 inklui funsionariu PNDS sira hotu.(Azu)
