Covalima (RCCT) 14-05-25-Programa Nasional Dezenvolvimentu Suku (PNDS) Munisipiu Covalima durante loron tolu nia laran fasilita formasaun ba funsionariu sira, konanaba kna’ar nudar fasilitador ba tekniku, finansas no fasilitator sosial hodi bele fasilita servisu iha terenu liu liu fasilita konaba prepara relatoriu.
Diretór Servisu Munisipal Apoiu Programa Nasional Dezenvolvimentu Suku (PNDS) Munisipiu Covalima Pedro de Araujo Gomes, relata katak antes ne’e iha ona formasaun ba funsionariu PNDS sira konaba manual programa implemetasaun.
“Formasaun ne’e ita hala’o durante loron tolu, hahu iha loron 13-15, ne’ebé atividade ida ne’e hanesan mos ita kapasita hela ita nia funsionariu PNDS sira ba iha k’nar ida-idak, hanesan fasilitador tekniku, finansas no sosial. Karik ba iha tekniku,! oinsa para sira bele fasilita ita nia komunidade le dezenu, oinsa sura material konstrusaun, liu liu fasilita ita nia ekipa suku ka komunidade oinsa bele prepara relatoriu”
“Ezemplu parte tekniku karik, bainhira ita hahu ona implementa presija ona update relatoriu progressu fiziku mai iha postu no kontinua to’o munisipiu, ho ida ne’e maka iha fulan kotuk liu ba ita halo mos formasaun hanesan ne’e, maibe ida ne’e liga liu ba iha prosesu PNDS, signifika katak ita liga jeral liu oinsa maka implementa PNDS tuir manual operasaun programa” Diretór Servisu Munisipal Apoiu Programa Nasional Dezenvolvimentu Suku (PNDS) Munisipiu Covalima, Pedro de Araujo Gomes,ba jornalista sira iha nia k’nar fatin PNDS Munisipiu Covalima Kuarta (15/05).
Nia afirma, iha formasaun ida ne’e espesifiku ba prosedimentu prienxe formatu programa PNDS nian.
“Prosedimentu oinsa atu prienxe formatu ida ne’ebé maka PNDS iha ona, hanesan karik ba iha parte finansas, oinsa sira bele fasilita ita nia ekipa suku prenxe formatu relatoriu, ne’ebé karik iha relatoriu liga ho PNDS, ne’e ita nia formatu prepara ona, ita nia estrutura suku hein prienxe deit formatu” nia dehan.
Formasaun ne’e partisipa masimu husi funsionariu PNDS Covalima, durante loron tolu, iha salaun enkontru Administrasaun Munisipiu Covalima (AMC),
Jornalista : Julio Salinas
Editor : Chamot Nahac
