Covalima (RCCT) 01-02-25-Planu Hakrak hasa’e prdusaun rai laran, hadi’a rendimentu ekonomia povu nian maka governu liu husi Sekretaria Estadu Kooperativa (SEKOOP) iha loron sabadu finde semana ne’e kontinua hamutuk ho kamponeza ka to’os na’in sira kuda Bafo Kay Rala iha Suku Belekasak, Postu Administrativu Maukatar, Munisipiu Covalima,
Sekretariu Estadu Kooperativa (SEKoop), Arsénio Pereira da Silva, hatete palnu governu ba tinan ida ne’e iha Covalima sei kuda Bafo Kay Rala iha to’o hamotuk hektares atus lima (500).
“Tuir dadus ne’ebé iha kuaze rai hektares 500 iha Munisipiu Covalima, ne’e maka ohin ami mai kuda Bafo Kay Rala iha Suku Belekasak, ida ne’e hanoin la’os foin primeiru ves, uluk mos sira kuda tiha ona iha periode ida uluk nian, ne’ebé ida ne’e hanesan halo lansamentu para depois kamponeze ka grupu agrikultor sira iha ne’e kontinua kuda nafatin” informa Sekretariu Estadu kooperativa (SEKOOP), Arsénio Pereira da Silva.
“Iha biban ne’e mos ha’u fo hanoin ba sira katak liu tiha fulan 3 ha’u sei mai fali hamutuk ho sira hodi halo lansamentu ba koilleta, tanba ita hatene katak ida ne’e komudity ida ne’ebé bele mos ba industria, no mos bele dulas ba konsumu ema nian no nia residu sira balu bele prosesa fila fali ba hahan balada sira nune’e mos nia produsaun final balu fornese ba iha programa merenda eskolar” Arsénio Pereira da Silva dehan.
Reprezenta Administrador Postu Administrativu Maukatar, Jesuino do Carmo, motiva komunidade Belekasak atu badinas halo to’os, kuda Bafo Kay Rala nune’e bele hasa’e produsaun iha suku laran.
“Hanesan reprezenta autoridade Postu Maukatar nafatin fo orientasaun ba komunidade sira atu badinas halo servisu liliu ba iha to’os ida ne’e hanesan ohin sekretaria estadu hatete ona fo motivasaun ba kuda Bafo Kay Rala ida ne’e, atu nune’e sira nafatin hasa’e produsaun atu nune’e bele sustenta ai han iha rai laran” nia dehan.
Enkuantu Sekretariu Estadu Kooperativa (SEKoop), Arsénio Pereira da Silva, nafatin enkoraza kamponeze sira atu kontinua kuda produsaun Bafo Kay Rala tanba restaurante buka atu hodi halo produsaun dosi, tan ne’e husu grupu sira labele duvidas, kontinua nafatin kuda Bafo Kay Rala tanba iha valor ekonomia no nia bele sustenta ai han iha rai laran.
Jornalista : Julio Salinas
Editor : Chamot Nahac
