Covalima (RCCT) 17-06-25-Prokurador Jeral Republika (PJR) hala’o enkontru ho entidade sira ne’ebé kolokadu iha Fronteira Postu Integradu Salele, hanesan; Servisu Alfandega, Polisia Imigrasaun no Polisia Unidade Patrullamentu Fronteira (UPF) inklui Unidade Investigasaun iha Komandu Polisia Munisipiu Covalima hodi hametin lasu amizade ba servisu hamotuk ida ne’ebé forti liu iha relasaun ba prosesu kontra bandu ne’ebé akontese iha liña fronteira.
Prokurador Jeral da republika Nelson de Carvalho hatete, Covalima hanesan ho Maliana no Oecusse, nudar Munisipiu ida ne’ebé lokaliza iha fronteira rai maran entre Timor Lesta no Indonezia, iha ne’ebé dala wa’in sempre hasoru situasaun investigasaun konaba kontra bandu ba ema sira ne’ebé halo movimentasaun illegal no mos prosesu krimi sira.
“Mai ko’alia ho sira para atu oinsa atu kuda nafatin lasu amizade servisu ninian liliu ba iha kauza ne’ebé mak relasaun ho prosesu ne’ebé mak iha kontra bandu iha ema ne’ebé mak tama illegal no mos prosesu krimi sira ne’ebé mak relasionadu ho Polisia Investigasaun ninian” Prokurador Jeral da republika Nelson de Carvalho, hatete.
Prokurador Jeral Republika salienta katak unidade hirak ne’e sempre iha prokupasaun konaba transporte ne’ebé sai difikuldade ba sira hodi hasoru servisu iha terenu.
“iha ne’e kada unidade iha preokupasaun, iha polisia sira rasik mos iha difikuldade liliu mak iha transporte, ita komprende katak iha munisipiu iha polisia sira investigasaun, wainhira sira simu mandadu notifikasaun husi prokurador sira, para atu ba notifika parte intervenensia sira, kestaun transporte ne’e difikulta tebes ba sira nia servisu tanba iha ne’e postu administrativu iha hitu. tanba ida ne’e mak atu hala’o notifikasaun ne’e iha kestaun difikulta itoan maka transporte” Relata Prokurador Jeral da Republika Nelson de Carvalho
Entretantu atividade inkontru entre PJR ho Diretór Alfandega, Komandante UFP, Polisia Imigrasaun, no Komandu Polisia Covalima liu husi unidade investigasaun ne’e hala’o iha salaun Minisiteriu Publiku Munisipiu Covalima.
Jornalista : Alfredo Barreto
Editor : Chamot Nahac
