Covalima (RCCT) 16-10-23–Sekretariadu Tekniku Administrasaun Eleitoral (STAE) husi nasional fo formasaun ba Pesoal Sekretariadu Tekniku Administrasaun Eleitoral hamutuk ema na’in-34 iha Covalima, hodi fo apoiu ba implementasaun eleisaun orgaun suku iha nivel aldeia durante âmbito eleisaun Lider Komunitaria.

Apoiu Tekniku STAE Nasional, Belarmino Filomino Neves, hatete objetivu husi formasaun ida ne’e atu hakbiit no hasa’e koñesimentu ka abilidade ba pesoal sira ne’ebé sei diriji meja asembleia eleitoral aldeia.

“Ohin ita hala’o formasaun ba pesoal STAE apoiu aldeia, pesoal sira ne’ebé atu fo apoiu ba implementasaun, realizasaun eleisaun orgaun suku iha nivel aldeia, objetivu husi formasaun ida ne’e atu hakbiit no hasa’e abilidade pesoal sira ne’ebé atu prezide meja asembleia eleitoral aldeia ne’e, atu nune’e iha momenutu realizasaun ba implementasaun eleisaun ne’e rasik iha ida-idak nia aldeia bele la’o ho di’ak” informa Apoiu Tekniku STAE Nasional, Belarmino Filomino Neves, ba jornalista sira iha Salaun STAE Munisipiu Covalima.

Nia haktuir formasaun ba Pesoal Sekretariadu Tekniku Administrasaun Eleitoral Apoiu Aldeia ne’e sei hala’o durante loron tolu, ne’ebé barak liu sei halo simulasaun ka pratika konaba oinsa sira atu forma meja bainhira akontese eleisaun.

“Formasaun ida ne’e ita sei hala’o ba durante loron tolu katak barak liu ita sei hala’o simulasaun ou pratika oinsa maka sira atu forma meja ka konstitui meja, oinsa maka atu prezide meja, oinsa maka atu prenxe akta sira ne’ebé relativamente ho votus nulu, votus branku no votus validu no mos prenxe akta konaba rezultadu ne’e rasik, ida ne’e maka ita atu hakbiit sira” nia dehan

Entertantu formasaun ne’e hala’o durante loron tolu hahu segunda ohin no sei remata iha kuarta semana ne’e no formasaun ne’e hala’o iha Salaun enkontru STAE Munisipiu Covalima.

Jornalista : Azu Salinas/Balta Moniz

Editor       : Chamot Nahac