Patriçio “ PNTL Covalima prepara halo Lelaun ba Motorizadas 16 ”

Covalima (RCCT) 11-05-21 Komandante Polisia Tranzito Covalima, Sargento Xefe Patriçio de Jesus Tersa Feira ne’e iha nia kna’ar fatin hateten, dadaun ne’e motorizadas hamutuk Sanulu resin neen (16) nebe para iha Edífisio Komando PNTL Municipio Covalima entrega ona ba Ministério Públiku (MP)

Ko’alia ba Jornalista sira, Komandante Trânzito ne’e esplika, Motorizadas Sanulu-resin-ne’en (16) ne’e, entrega ona ba Ministério Públiku no deside ona motorizadas 16 ne’e sai hanesan património Estado nian, tanba ne’e Polisia Trânzito sei hein desizaun tuir mai husi Ministério Públiku (MP), molok tama ba prosessu lelaun.

Motor maka iha ne’e hamutuk Sanulu-resin-neen (16), maibe motor sira ne’e ami entrega ona ba Ministério Públiku, no Minitério Públiku mos desidi tiha ona katak tanba ba património Estado nian, tamba ne’e ami sei hein desizaun tuir mai husi Ministério Públiku, oinsa atu tama prosessu lelaun” Dehan Komandante Tranzito Municipio Covalima.

Komandante Patricio hatutan, motor hirak ne’e Polisia Tranzito Covalima Prende durante Tinan barak ona, tanba dokumentos la iha, no nain ba motor hirak ne’e la apresenta aan iha Edifiso Komando PNTL Covalima, tanba ne’e iha fulan hirak liu ba Polisia Trânzito entrega ba Ministerio Públiku (MP) hodi bele halo prosesu tuir dalan legais.

Motor hirak ne’e Prende tinan barak ona, dokumentos la iha, depois na’in la apresenta an iha ne’e, nebe motor ne’e rai hanesan ema na’in la iha, ne’e maka iha Fulan hirak liu ba ami entrega ba Ministério Públiku hodi halo prosessa ” Patriçio de Jesus relata.

Komandante Tranzito ne’e mos informa, bainhira iha ona desizaun husi Ministério Públiku (MP) maka PNTL Covalima sei aviza ba komunidade sira hodi kontinua ba prosessu lelaun baseia ba desizaun husi Ministério Públiku.

Ami hein deit desizaun husi Ministério Públiku (MP), se karik desizaun tuir mai tama iha prossesu lelaun, ami sei avizu, maibe depende desizaun motor sira ne’e lelaun ka oinsa ” Komandante Patriçio hakotu.

Jornalísta : Tynho Gusmão & Aje Ferreira

Editór : Chamot Nahac