Covalima (RCCT) 08-03-23–Sekretaria Munisípiu Covalima, Fransisco de Jesus Alves, hateten partisipasaun feto iha vida politika iha Munisipiu Covalima sei menus, relasiona ho ezsitensia suku 30 iha Covalima maibe feto na’in ida deit maka sai xefe suku.
Tanba ne’e Francisco de Jesus Alves Eskoraza feto sira atu envolve masimu iha vida politika hodi kompete ho mane sira.
“Covalima iha Suku 30 maibe ita hetan deit inan feton na’in-1 sai xefe suku, ha’u hanoin ida ne’e partisipasaun feto iha vida politika sei menus tebes, tanba ne’e maka ho selebrasaun loron mundial ida ohin ne’e, ita selebra no fo korazen inan feton sira atu involve maka’as liu tan iha vida politik no iha atividade hotu hotu” informa Sekretaria Munisípiu Covalima, Fransisco de Jesus Alves, ba jornalista sira hafoin partisipa iha selebrasaun loron mundial feto ne’ebe organiza husi World Vision hala’o iha salaun Administrasaun Munisípiu Covalima, Kuarta (08/03).
Sekretaria Munisípiu Covalima afirma eleisaun parlamentar no eleisaun suku mos besik ona tan ne’e korazen nafatin ba inan feton sira atu involve no hola parte iha vida politik nian liu liu kandidata an sai xefe suku no sai membru parlamentu, sai membru governu, sai administrador munisipiu, administrador postu no asume mos kargu xefia sira iha instituisaun estadu nian hodi dezenvolve rai ida ne’e liliu iha rai Covalima.
Iha fatin hanesan, Pontu Fokal Sekretaria Estadu Igualdade no Inkluzaun Munisipiu Covalima Francisco T.G de Araújo, dehan partisipasaun iha dezenvolvimentu maoria mane, dezenvolvimentu sei la lao ho susesu tan ne’e presija mos partisipasaun feto sira nian hodi bele hato’o sira nia inspirasaun.
“Ita hamutuk atu bele motivu no fo motivasaun katak partisipasaun iha dezenvolvimentu ne’e se mane deit ita nia dezenvolvimentu sei la la’o ho susesu, tanba ne’e maka presija mos ho ita nia inan feton sira atu hola parte bele fo mos sira nia hanoin, hato’o mos sira nia inspirasaun atu nune’e para bele atinje igualidade ne’ebé maka ita hotu hakarak” informa Pontu Fokal Sekretaria Estadu Igualdade no Inkluzaun Munisipiu Covalima Francisco T.G de Araújo.
Nia haktuir governu iha komitmentu bo’ot ratifika konvensaun lubuk ida, konvensaun konaba hahalok diskriminasaun kontra feto sira, ida ne’e governu nia komprimisiu bo’ot atu bele garante hodi asegura ba iha asuntu igualidade jéneru ninian.
“Ita iha enkuadramentu barak ne’ebé maka sei inklui ema hotu hotu ho prinsipiu ida katak sei la husik ema ida iha kotuk, tanba ne’e mak ohin loron iha komemora loron mundial feto atu hodi hanoin hikas oinsa atu ita bele luta hamutuk” nia dehan.
Nia hatutan partisipasaun feto iha vida politik ne’e imporrante tebes tanba prosesu dezenvolvimentu atu la’o diak ne’e presija involve mos inan feton sira, labele husik sira iha dapur deit.
Jornalista : JS
Editor : CN
