COVALIMA (RCCT), 03-09-2026 — Sarani Parokia Ave Maria Zumalai, Munisípiu Covalima, intensifika preparasaun ba visita Mahein Edukasaun João Paulo II, liuhusi enkontru dala-rua ne’ebé foka ba koordenasaun misa, oráriu, hananu no partisipasaun komunidade durante períodu visitasaun.
Vizitasaun ne’e sei hala’o durante fulan ida ho balun, hahu husi loron 13 Setembru to’o loron 22 Novembru 2026, iha Parokia Ave Maria Zumalai.
Reverendu Padre Vigáriu Parokia Ave Maria Zumalai, Amandio Soares Salsinha, dehan preparasaun oráriu misa tenke halo ho kuidadu no koordena ho Edukasaun, tanba padre na’in-tolu sei fahe malu atu selebra misa durante períodu visitasaun.
“Husi parte parokia, ita nia hanoin mak oinsá ita adapta ho oráriu ne’ebé mai husi Edukasaun, atu nune’e ita bele haree parte misa nian iha ne’e. Iha padre na’in-tolu, sira sei fahe malu tuir oráriu, hodi bele selebra misa iha momentu ne’ebé Illas vizita,” nia hatete.
Nia mós husu ba eskola sira atu koordena oráriu misa ho antecedénsia, liuhusi katekista, xefe aldeia ka komisaun eskola, atu evita difikuldade bainhira padre presiza ba Rai-Dili ka iha atividade seluk.
“Ba eskola ne’ebé presiza misa, oráriu tenke haruka antes liuhusi katekista, ka liuhusi xefe aldeia, ka liuhusi komisaun kada eskola. Se mai derepente padre na’in-rua ba Rai-Dili, se mak sei taka? Ami bele taka malu. Importante mak komunikasaun no kolaborasaun,” nia hatutan.
Padre Amandiu subliña mós katak preparasaun hananu tenke sai parte importante iha preparasaun eskola sira. Hananu bele uza lian Tetun, Português ka Latin, tuir kapasidade no preparasaun kada eskola.
“Iha parte seluk, kada eskola ida-idak prepara nia hananu sira. Bele Tetun, bele Português, bele Latin; importante mak prepara ho di’ak. Durante misa loron-ba-bainhira, Gloria la iha, maibé se monu iha Domingu, tenke kanta hananu kompletu,” nia informa.
Kona-ba festa santu ne’ebé monu iha Domingu, nia sujere atu misa Domingu hala’o tuir liturjia Domingu, enkuantu venerasaun ba santu bele hala’o iha kalan. Misa festa nian bele hala’o iha Segunda-Feira dadeer no depois lori imajen santu ba fatin-fatin.
“Atu sujere de’it, se santu ne’e monu iha Domingu, labele misa tanba loron Domingu boot liu santu sira hotu. Entaun, iha Domingu dadeer ita halo misa iha ne’e hotu. Ita ba simu, lori mai no rai de’it. Iha kalan ita halo venerasaun, no Segunda-Feira dadeer ita halo misa, depois lori sai ba fatin-fatin,” nia esplika.
Visitasaun Mahein Edukasaun João Paulo II sei sai oportunidade importante ba sarani Parokia Ave Maria Zumalai atu hametin fiar, unidade no partisipasaun komunidade iha vida Igreja.
Jornalista: Julião Correia
Editor: Paul Mandeu
