.png)
Covalima (RCCT) 25-03-24-Autoridade Munisipiu Covalima selebra akordu ba Programa Merenda Eskolar (PME) ho kordenador Ekipa Jestaun Programa (EJP) hamutuk 23 iha Munisipiu Covalima.
Iha intervensaun Prezidente Autoridade Munisipiu (PAM) Covalima Miguel Armada Cardoso, husu ba kordenador Ekipa Jestaun Programa (EJP) 23 atu implementa programa merenda eskolar ho responsabilidade.
“ha’u hakarak fo hanoin ba ita bo’ot sira, implementa merenda eskolar ho osan ida ne’ebé bo’ot tebes iha munisipiu hotu. inklui Covalima liliu iha eskola balu ne’ebé estudante barak, dala ruma ita bele dehan ha’u bele ezekuta mais buat ida ke todan, tanba sa maka hatete dehan todan kuandu ezekuta la tuir nia mata dalan ita hotu bele ba para iha hotel gratuita Tabakolot, kuandu ezekuta tuir nia mata dalan, ezekuta tuir nia lalaok ne’ebé iha ha’u agradese tanba la’o di’ak ne’ebé ohin loron PAM sei asina kontratu ho kordenador EJP sira atu nune’e bele ezekuta ho nia k’nar iha ita bo’ot sira nia eskola ida-idak, ita iha Covalima iha ona EJP 23 ne’ebé maka ohin loron atu asina hamutuk ho PAM la’os asina ho diretór sira, la’os asina ho Administrador Postu Administrativu no xefe suku sira maibe asina ho PAM hatudu katak imi ezekuta karik PAM sei kontrola tuir, PAM labele kontrola direita karik maibe iha nia ain liman hanesan APA no xefe suku sira atu kontrola, tan ne’e liu rai sira administrador postu sira iha, tanba ida ne’e APA ho liu rai sira atu hare kestaun ida ne’e klean tan estadu gastu nia osan barak tebes hala’o ida ne’e atu susesu, tan ne’e dala ida tan husu atu ida-idak maneja tuir mata dalan ne’ebé iha ho responsabilidade” informa PAM Covalima Miguel Armada Cardoso hafoin loke abertura ba asina akordu programa merenda eskolar ho kodernador EJP 23 iha Covalima ne’ebé hala’o iha Salaun enkontru Administrasaun Munisipiu Covalima Segunda (25/03).
Reprezenta Diretora Edukasaun Munisipiu Covalima, Xefe Departamentu Administrasaun Eskolar Munisipiu Covalima, Gregario Afonso Ferreira, ba jornalista sira dehan total orsamentu ba programa merenda eskolar ba tinan ida ne’e ho montante milliaun $ 1 resin ba Covalima.
“Ba tinan ida ne’e total orsamentu montante dolares Amerikanu millaun ida atus hat hitu nulu resin ida, atus nen tolu nulu resin nen ($ 1.471.636,00) ba Ekipa Jestaun Programa (EJP) 23, konaba menu laiha mudansa, maibe sira husi Moveimentu Kamponeza Timor-Leste (MOKATIL) rekomenda mai katak liu husi programa merenda eskolar ne’e atu sosa sira nia batar ai naruk ne’e maka ita sei hare, ita atu implementa ba eskola hira tanba batar ai naruk ne’e nia labele kobre ba alunu hamutuk ema na’in 17.804 iha Munisipiu Covalima, tan ida ne’e ita labele implementa maibe ita foti de’it eskola ida ka rua atu bele uza batar ai naruk ne’e, ba menu seluk ha’u hanoin nafatin, ita bo’ot sira mos hatene ohin asesor mos hatete ona katak husi orsamentu programa merenda eskolar ne’e sentavus ida deit mos sei labele halai hodi ba sosa Xineza sira nia produtu tanba ne’e ita hein iha implementasaun ne’e, tinan uluk ita iha pursentu 85, maibe ami hein ba tinan ne’e bele sa’e tan pursentu, espera katak servisu hamutuk ho autoridade munisipal inklui ita hotu tau matan ba PME ne’e bele la’o di’ak, ha’u hein katak agora ba oin tanba sira iha esperiensia ona hanoin sei labele akontese tan EJP sira labele sosa tan produtu husi loja Xineza sira fo han estudante sira iha eskola, maibe akontese tan ita sei fo xamada dala 3 kontinua ba fatin maka ita bele halo subtituisaun ba sira nia supplente sira, maibe ha’u fiar katak sira sei servisu di’ak los uluk ne’e akontese tanba laiha esperiensia” nia dehan.
Entertantu tuir matadalan Programa merenda eskolar nian, sei la autoriza atu sosa produtu sira ne’ebé fa’an iha loja xineza sira, engkuantu Mokatil rekomenda sira nia produtu atu fornese ba progama merenda eskolar iha Covalima.
Editor : Chamot Nahac
