Covalima (RCCT) 07-06-24-Relasiona ho akontesimentu udan ne’ebé durante ne’e la para hodi hamosu inundasaun iha fatin fatin inklui sobu fasilidade publiku hanesan ponte, estrada no moru eskola sira ne’ebé monu, tan ne’e Prezidente Autoridade Munisipiu (PAM) Covalima Miguel Armada Cardoso (Razão), hatun ona orientasaun ba iha Diretór Servisu Munisipal Obras Publika no Transporte (SMOPT), Sidonio Gusmão tun ba terenu atu identifika ponte hira maka ameasa kotu no observa estrada ne’ebé maka monu ka kotu total.
Prezidente Autoridade Munisipiu (PAM) Covalima mos hatun orienta ba Xefe Suku no xefe aldeia sira hala’o asaun ho seriedade nune’e bele hato’o relatoriu ho loos.
“PAM orienta kedas ona ba iha obras publika hodi identifika no halo relatoriu, nune’e mos ba iha xefe suku, xefe aldeia no konsellu suku sira atu tau matan seriu hodi nune’e fo relatoriu mai iha PAM nune’e PAM bele kontinuasaun relata ba iha ministeriu kompetente” infrma PAM Miguel Armada Cardoso (Razão) ba Jornalista sira hafoin ho ekipa tun ba iha terenu hodi hare kondisaun komunidade sira ne’ebé afeta ba inundasaun iha Aldeia Maukola, Suku Beko, Postu Administrativu Suai.
PAM Covalima mos hatete oras ne’e daudaun bolu ona IGE hodi normaliza dalan sira ne’ebé oras ne’e kotuk, no sei buka dalan hodi evakua komunidade sira iha Raimea ba fatin seguru husi inundasaun.
“Tanba ida ne’e maka ita husu ba iha ekipamentu pezadu bo’ot sira ne’e maka ita bolu ona daudaun Instituto Gestaun no Ekipamentu agora ita iha, kuandu IGE ba ladi’ak bele ho trator, bainhira dalan seluk laiha ita atu evakua komunidade Raimea ne’e ita bele uza makina bo’ot sira ne’e mos bele, nune’e mos se mota sira ne’ebé rezulta barak liu ita buka hare ninia pontu sira ne’e liliu husi ita nia obras publika hare mos kestaun ida ne’e ho di’ak, se pontu ne’ebé maka rezulta inundasaun iha ne’eba ita bele satan netik ho makina pezadu sira ne’ebé iha hodi normaliza fali” dehan PAM.
Entertantu tuir observasaun jornalista nota katak estrada diresaun Halis Au Laran Suku Lalawa, Postu Administrativu Tilomar liga ba Postu Fohorem no Fatumea oras ne’e kondisaun grave, estrada Bemean kotu total maibe normaliza ona, ponte ai ida iha Aldeia Kulu-Oan, Suku Tashilin,ligadu ba iha Suku Raimea oras ne’e daudaun labele liu tanba ai sira laiha hotu ona tan ne’e maka oras ne’e dauduan komunidade iha Suku Raimea labele evakua ba iha fatin seguru tanba laiha dalan atu bele liu hodi tama ba iha Suku Raimea.
Jornalista : Julio Salinas
Editor : Chamot Nahac
