Covalima (RCCT) 07-06-24-Relasiona udan bo’ot ne’ebé ho intensidade maka’as rezulta akontese inundasaun iha Covalima halo be tama komunidade nia uma no estraga aihan no mos estraga plantasaun iha ne’ebé komunidade kuda iha to’os no natar.
Tanba ne’e Prezidente Autoridade Munisipiu (PAM) Covalima Miguel Armada Cardoso (Razão), Sesta (07-05) ne’e hatun kedas orientasaun ba iha Sekretariu Autoridade munisipal na’in 3, Komandante PNTL Covalima, Komandante Operasaun Autoridade Protesaun Civil Covalima, Komandante Bombeiru, Diretór servisu munisipal na’in 19 iha Covalima no Diretór servisu delegasaun teritorial inklui parseiru sira hanesan Cruz Vermella Timor-Leste atu tun ba iha terenu hodi halo intervensaun ba komunidade afetadu ba inundasaun.
“Desde dader de’it PAM orienta ona ba Sekretariu Autoridade Munisipal Covalima na’in 3, no mos ba komandante PNTL Munisipiu Covalima, Komandante APC Covalima, Komandante Bombeiru Covalima, diretor munisipal na’in-19 nune’e mos diretor servisu delegasaun teritorial sira nomos parseiru sira hanesan CVTL halo intervensaun ruma ba iha komunidade nia let, ho ida ne’e maka PAM organiza no fahe ona ba grupu tolu, grupu ida ho Sekretariu Munisipal Asunto Sosiais no oragnizasaun, grupu ida seluk ho Sekretariu Munisipal Planeamentu Investimentu Dezenvolvimentu Integradu halo nia intervensaun ba iha parte Zumalai to’o iha Suku Raimea, Sekretariu Munisipal Asuntu Sosiais no oragnizasaun maka nia evakua ita nia komunidade husi Suku Suai-Loro mai iha sentru evakuasaun iha Eskola Sekundaria Geral Publiku Suai, PAM ho Komandante munisipiu, Komandante APC, Komandante Bombeiru ho mos servisu delegasaun teritorial balu inklui parseiru CVTL halo observa direita ba iha Akar Laran, Suai-Loro, no mos ba iha Tafara liu ba fronteira no mai iha Beko” informa PAM.
PAM afirma, ho situasaun real ne’e, evakua komunidade Suku Suai-Loro mai iha sentru evakuasaun munisipal ne’ebe lokaliza iha Eskola Sekundaria Geral Publiku Suai, tanba be komesa sa’e maka’as tama komunidade nia uma.
“Situasaun real hatudu katak iha Suku Suai-Loro evakua ona ita nia komunidade hamutuk na’in-166 no nune’e mos iha fatin balu hanesan iha Akar laran ita tama ladi’ak maibe komunidade iha ne’eba sei sente seguru hela komun dalan maka kotuk ita liu ladi’ak maibe hau haruka trator rua ba ona iha ne’eba bainhira sira sai ladi’ak karik trator sira ne’e bele ajuda tula sai komunidade sira husi ne’eba ida ne’e maka PAM halo ho estrutura tomak” nia dehan.
Entertantu tuir observasaun jornalista iha terenu nota katak ekipa ne’ebé lidera husi PAM konsege evakua komunidade sira iha Suai-Loro lori mai iha Sentru Evakuasaun ne’ebé lokaliza iha Eskola Secundariu Geral Publiku (ESGP) Suai.
Jornalista : Julio Salinas
Editor : Chamot Nahac
