COVALIMA (RCCT) 09-01-25-Prezidente Autoridade Munisipiu Covalima, Miguel Armada Cardoso “Razão” konvoka reuniaun ho Diretór Servisu Munisipal Agrikultura Munisipiu Covalima Lino Magno ho nia funsionariu sira hotu hodi tau planu prioridade hasa’e produsaun agrikultura iha Munisipiu Covalima, no husu extensionista sira atu halore sira nia programa no atividades ne’ebé mak preve ona osan iha planu orsamental 2025 nian.
Husi reuniaun ne’e atu hare funsionariu agrikultor liu liu extensionista sira nia servisu iha area rua mak hanesan demoplot ho demo area.
“Iha reuniaun ida ne’e mos atu hare ona extensionista sira nia servisu liliu iha area rua ne’ebé ita mehi hela demoplot ho demo area, fatin rua ne’e ita atu la’o, no ida seluk mos ita identifika ona problema balu iha Suku Raimea liliu iha kanal ba irigasaun Ailok no mos kanal irigasaun Kay Rala ne’ebé maka fo impaktu durante ne’e labele halo koileta ba dala rua, se bainhira irigasaun rua ne’e ita normaliza ona automatikamente ita bele halo koileta ba dala rua tanba iha Beilaku ka Raimea ne’eba rai bo’ot.” informa PAM ba Jornalista sira hafoin remata konvoka reuniaun ho funsionariu Agrikultura sira iha Salaun enkontru Administrasaun Munisipiu Covalima.
Razão esplika, Munisipiu Covalima hetan ona fasilidade ne’ebé sufisiente atu hodi apoiu agrikultor sira hodi servisu ba hasa’e produsaun agrikultor.
“Depois ita mos simu ona trator bo’ot ne’e iha unidade-31, hand trator iha unidade 30, Nune’e mos makina ko’a haree iha unidade-6 no makina ko’a haree unidade 36 katak buat sira ne’e sufsiente oin nusa PAM nia planu katak ita bele hasa’e produsaun liu husi intensifikasaun no bele halo extensifikasaun hodi nune’e haluan tiha area hirak ne’e rai ne’ebe kultiva ne’e bele hadi’a tan ida ne’ebe sei dauk kultiva ne’e ita bele hare hodi nune’e iha produsaun ne’ebe naton ba iha Munisipiu Covalima, tanba liu husi planu PAM nian hodi extensionista sira foka ba iha Raimea rotativamente bele traka malu ativa iha ne’eba hodi demoplot ne’e bele la’o” informa PAM ba Jornalista sira hafoin remata konvoka reuniaun ho funsionariu Agrikultura sira iha Salaun enkontru Administrasaun Munisipiu Covalima.
Iha fatin hanesan Diretór Servisu Munisipal Agrikultura Munisipiu Covalima, Lino Magno haktuir, asuntu prinsipal ba planu atividade agrikutura tinan 2025 maka atu hasa’e produsaun rai laran, no mos planu haluan area foun ba rai hektares 300 iha Aldeia Halik, Suku Beko, Postu Administrativu Suai.
“Asuntu ba agrikultura maka planu atividade 2025 ne’e la’o oinsa bele halo planu para hasa’e produsaun iha Covalima, tanba ida ne’e maka ami hala’o enkontru, no enkontru ida ne’e realiza tanba orientasaun mai husi PAM rasik, planu primeiru maka hakarak ka lakohi ita tenke halo servisu tuir planu hanesan rai hektares 300 ida nebe maka durante ne’e propoin duni husi PAM ho mos agrikultura rasik propoin halo planu ba rai hektares 300 atu haluan area foun, iha ne’eba sei kuda komuditi oioin iha rai hektares 300, no fatin ne’e sei sai fatin integradu ita atu loke peskas nian, pekuaria depois agrikultura no hortikultor ita sei implementa iha area 300 hektares ne’e, buat barak mak sei hala’o iha ne’eba mak hanesan peskas nian halo kolam ikan iha unidade 50, ba pekuaria mos ita sei hakiak fahi, karau, bibi, manu lokal ho manu rade ida ne’e mak ita sei halo iha area Halik, Suku Beko” nia dehan.
Enkuantu PAM Covalima Miguel Armada Cardoso “Razão” dehan governu apoiu ona fasilidade ne’ebé sufisiente hodi kria kondisaun atu hasa’e produsuan agrikola iha munisipiu covalima, tan ne’e husi ba komunidade agrikultor sira mos tenki badinas halo to’os no natar.
Jornalista : Julio Salinas
Editor : Chamot Nahac
