Miguel Armada Cardoso kodigu Razão, dehan Covalima selebra 20 de Maiu 2024 diferensia ho tinan sira ne’ebe liu ona basa komemora 20 de maiu bada XXII, Covalima la iha atividade joga bola guling.
“Iha mudansa uitoan tanba kada tinan la’o jogu hanesan bola guling iha, maibe tinan ida ne’e no loron ida ne’e rasik ita anima komunidade sira ho joga tradisional sira seluk hanesan futu manu ne’e kontinua nafatin ho ida ne’e halo mudansa buat balu tanba ne’e ita hakarak muda ona ka transforma ona ita nia hahalok sira ne’ebé baibain ita la’o, mai tuir isar bandera karik tanba de’it jogu, maibe ita agora muda ona komunidade sira nia nia hanoin, sira tenke iha hanoin ida katak mai tanba iha patriotismu mos iha nasionalismu, mai tanba hadomi rai ida ne’e la’os tan jogu bola Guling maka ita mai” informa PAM Covalima Miguel Armada Cardoso, ba jornalista sira iha ambitu selebrasaun loron restaurasaun independensia, 20 de Maiu 2024 ba dala XXII iha Kampu Ladi Kamanasa.
Entertantu atividades sira ne’ebé hala’o iha selebrasaun 20 de Maiu 2024 ba dala XXII iha Munisipiu Covalima, anima komunidade ho atividade desportu hanesan futebool, voly boll feto no mane, basket boll feto no mane, atletismu, sa’e bua, tata berlindus, dada tali inklui tebe dahur iha kampu ladi.
Jornalista : Julio Salinas
Editor : Chamot Nahac
