Covalima (RCCT) 10-05-24-Prezidente Autoridade Munisipiu Covalima, Miguel Armada Cardoso, aprezenta asuntu importante tolu ne’ebé hala’o ona iha Covalima maibe seidauk iha kontuidade hanesan mega projetu Suai Supply Base (SSB) Auto Estrada no harii bairru foun ba komunidade afetadu ba konstrusaun aero portu Suai.
PAM Covalima Miguel Aramada Cardoso, dehan prosesu dezenvolvimentu auto estrada hala’o seidauk to’o nia rohan, aero portu di’ak ona, Suai Supply Base selu ona indimizasaun ba komunidade afetadu.
“Vizita ida ne’e vizita traballu ami agradese hanesan ita hotu hatene katak iha Munisipiu Covalima hetan vizita husi sua xelencia relasiona ho prosesu Suai Supply Base nian, auto estrada nune’e mos aero portu nian no sira seluk tan ne’ebe maka durante ne’e la’o ona maibe seidauk iha kontinuasaun tanba kestaun balun, maibe ami nota hela buat ami la’o ona liliu hakarak atu aprezenta ba nai ministru relasiona vizita traballu ne’e, primeiru hakarak atu informa uluk konaba auto estrada buat balu la’o di’ak ona ita husik hela, auto estrada iha dalan balu maka agora rai monu hodi taka tomak kuaze ita atu liu fatin laiha ona ho hirak ne’e hotu maka ami apela ba nai ministru hodi haree netik ami nia karta pedidu ida hato’o ona ba iha Ministru Obras Publik hodi haree kestaun ida ne’e atu bele suru sai rai hirak ne’ebe oras ne’e nakonu iha auto estrada, ko’alia konaba manutensaun hanesan dalan balu at ona hau fiar katak ho prezensa nai ministru nia vizita ne’e bele haree ho matan rasik katak ida ne’e maka di’ak ida ona, iha biban ne’e hakarak atu informa mos ba prosesu ne’ebe iha tinan 2017 konaba prosesu kampu aviasaun maibe iha bairru foun la sala iha uma kain-61 iha Hilbelis, Suku Labarai, Postu Administrativu Suai, seidauk hadi’a sira nia kondisaun, maske ita halo kompensasaun osan ba ba sira ne’e la’o ona maibe sira kontinua hela tanba seidauk harii bairru foun ba sira hodi hela ba maka sira kontinua hela nafatin iha iha fatin refere” deklara Armada ba ministru.
Hatan ba asuntu hirak ne’e Ministru Petróleu Rekursu no Minerais, Francisco da Costa monteiro konsidera sei buka solusaun ba preokupasaun Prezidente Autoridade aprezenta.
“Ho kestaun sira ne’ebe ohin ita bo’ot temi ne’e mak lori ami mai iha ne’e, misaun prinsipal ami mai iha ne’e, ha’u rasik foti inisiativa hahu ohin mai iha Covalima to’o loron domingu ha’u sei iha parte kosta sul, para atu haree auto estrada, hanesan imi hatene governu nia planu halo fila fali projetu tasi mane inklui Suai Supply Base ho aero portu no buat sira ne’e hotu tama iha laran, kona ba auto estrada solusaun iha laran ona, konaba bairru foun Prezidente Timor Gap maka ne’e ho nia ekipa sira namanas loos la sala kontratu asina tiha ona iha semana ida ka rua mai ne’e ema sei mai iha ne’e para harii ona bairru foun, ne’e importante tebes tanba tanba bairru foun ne’e hanesan nesesidade ida paralende ne’e sira nia direitu duni prersija ita realoka sira ba iha bairru foun” dehan Ministru Petróleu Rekursu no Minerais, Francisco da Costa monteiro.
PAM Covalima Aprezenta asuntu importante tolu e’e hafoin simu vizita traballu husi Ministru Petróleu Rekursu no Minerais, Francisco da Costa monteiro ho nia ekipa iha Covalima.
Entertantu hafoin sorumutu ho Prezidente Autoridade Munisipiu Covalima remata Ministru Petróleu Rekursu no Minerais, Francisco da Costa monteiro ne’ebé akompanha husi Prezidente Timor Gag ho ekipa tun direita ba iha terenu hodi observa direita ba iha kondisaun auto estrada hahu husi Suai ba to’o iha Zumalai.
Jornalista : Julio Salinas
Editor : Chamot Nahac
