Covalima (RCCT) 22-03-24-Administrador Postu Administrativu Tilomar Venancio Sarmento dehan, iha ona planu proposta ba orsamentu tinan 2025 ne’ebé tau prioridade ba hadi’a Estrada ligasaun postu administrativu Tilomar ho Fatumea no mos baliza ho Postu Administrativu Fohorem, alende ne’e mos fo prioridade ba komunidade sira atu asesu ba be mos ho dignu iha Suku Beiseuk no hadi’a edifisiu Administrasaun Postu.
Administrador Postu Administrativu Tilomar relata lia ne’e relasiona ho diskusaun entre membru Asembela Postu Administrativu ne’ebé halo ona iha semana foin lalais hodi halo identifikasaun ba prioridade sira iha suku 4 mak partense iha Tilomar hodi prepara proposta ba planu orsamentu tinan 2025.
“Ami halo tia ona planu iha semana kotuk, ami halo tia ona enkontru konsellu, enkontru ho suku hat ne’ebé ami halo ona planu proposta ba iha orsamentu 2025 ne’ebé tempu badak ami sei submete ba iha munisipiu, ba iha orsamentu 2025 nian ne’ebé mak prioridade ba iha konstrusaun Estrada, no mos be mos no ba edifisio postu tilomar ninian, estrada ne’e tau prioridade husi suku Lalawa sei ba to’o baliza ho postu fatumea no fohorem, depois be mos sei iha suku Beiseuk iha aldeia Foho lulik, aldeia Maubesi no mos Fatuk Metan, Aldeia Nikir agora Programa PNDS 2024 ne’e sira Ezekuta ona” Relata Administrador Postu Administrativu Tilomar, Venancio Sarmento ba RCCT iha nia K’nar fatin.
Entretantu Iha Postu Administrativu Tilomar Kompostu husi Suku 4, Aldeia 23 ho Total Polulasaun, tuir dadus postu tinan 2023 nian, hamotuk ema na’in rihun sanulu resin ida atus tolu, tolu nulu resin sia.
Jornalista : Moichung
Editor : Chamot Nahac
