COVALIMA (RCCT) 06-12-23—Relasiona ho deklarasaun husi Administrador Postu Administrativu Maukatar iha nia deskursu ba serimonia hatun bandeira nasional be serimonia komemorasaun proklamasaun unilateral timor leste ba dala 48 foin lalais ne’ebé kestiona konaba servisu Offisial Polisia Suku balu iha Maukatar la hala’o servisu tuir orientasaun husi komando no la fo seguransa ho dignu ba komunidade.
Relasiona ho okaziaun ne’e, Komandante Polisia Nasional Timor-Leste (PNTL) Munisipiu Covalima, Calisto Gonzaga hateten, ema ruma hakarak kestiona servisu OPS nian bele mai hato’o iha komandu munisipiu atu bele hatene tuir, labele ko’alia instituisaun ida nia servisu sem evidensia. Komandante ne’e mos dehan, OPS hanesan liman ain husi komando no mos antes ne’e OPS sira hala’o funsaun dupla iha suku no eskuadra, maibe iha fulan tolu liu ba muda ona katak OPS sei hala’o deit servisu durante oras 24 nia laran iha suku deit la tama ona iha eskuadra.
“Ha’u hanoin servisu hotu hotu ne’e depende servisu instituisaun ninian OPS ne’e nia hanesan ain liman ne’ebé husi komandu liliu iha Covalima, ita iha OPS hamutuk ema na’in-30 ne’ebé ita koloka ba suku 30, Postu Maukatar iha Suku 4. uluk liu OPS sira ne’e hala’o funsaun dupla, nia iha suku depois mai halo vizilansia iha eskuadra, ita haree ida ne’e maka la efetivu ne’e maka ha’u orienta hela iha fulan 3 liu ba, ha’u hatun despaixu OPS sira sei halo servisu 24 oras nia la tama ona servisu iha eskuadra nian, hau’ elimina ona, ha’u halo despaixu tun ona iha transferensia fulan tolu liu ba, loos duni ita servi ne’e ba komunidade se ema ruma hakarak levanta provas ruma konaba hahalok ita nia membru polisia sira iha nivel suku, ha’u hanoin bele mai hato’o ninia denunsia ka keixa ruma para bele ita husu tuir tanba saida mak nia laiha ne’eba, nia iha ne’eba tanba sa mak nia la tuir, ita labele dehan instituisaun ida nia servisu hanesan ne’e mas no fim ita ko’alia la tuir regras, tanba regras ita koloka membru ida ba iha suku ka munisipiu ida ne’e ha’u elimina tiha ona servisu iha fulan tolu liu ba” informa Komandante Polisia Nasional Timor-Leste (PNTL) Munisipiu Covalima, Calisto Gonzaga ba RCCT iha nia knar Fatin Komando PNTL Munisipiu Covalima Kuarta (06/12/23).
Nia husu ba membru OPS hotu hanesan reprezenta komandu munisipiu no komandu jeral tenki hala’o servisu ho profesional, servisu tuir lei no ordem ne’ebé komando hatun ona.
“OPS hatene nia servisu, desizaun saida deit mak nia foti ne’e reprezenta ha’u, reprezenta komandante jeral no sira nia relatoriu ne’e ha’u akompaña hela iha Whatsapp grup OPS nian, la’os ha’u mesak maka akompaña maibe komandante jeral mos akompaña nune’e ita bele hatene katak sira servisu duarnte oras 24 iha suku ne’e halo nusa, fo hanoin ba membru OPS sira tenke servisu profesional, hala’o servisu tenke tuir lei, servisu ne’ebé tuir ita nia filosofia instituisaun polisia komunitaria, tan populasaun, tanba sidadaun ne’e maka ita koloka to’o iha nivel suku ne’e koloka hela ita nia efetivu iha ne’eba, ne’e mak ofisial polisia suku, ne’ebé ha’u hanoin regras ne’ebé ita iha, ita iha normas organizasaun prosedimentu ba OPS nian mos iha, ita iha normas ba planeamentu suku nian, tuir fali buat sira seluk nufim prezudika fali ita nia prezensa iha nivel suku no ita nia sidadaun hotu kestiona buat ida ne’e ba ita” nia dehan.
Engkuantu Antes ne’e Administrador Postu Administrativu, Maukatar Constantino do Carmo Cardoso, iha diskursu, serimonia hatun bandeira Nasional ba selebrasaun loron proklamasaun Independensia ba dala 48 iha Maukatar, kestiona Ofisial polisia suku (OPS) hala’o servisu la tuir orientasaun husi komandu no la fo seguransa ho dignu ba povu.
“Tuir ha’u nia observasaun OPS sira la halo ninia servisu tuir orientasaun komando, liliu OPS sira, ita boot sira labele hanoin depende deit ba an tanba mai husi instituisaun, mais labele, hanesan administrador postu ita boot sira fo seguransa ba hau nia povu tenke ho dignu labele husik hela hau nia povu hanesan manu oan ki’ik ida” informa Administrador Postu Administrativu Maukatar Constantino do Carmo Cardoso ia nia diskursu 28 novembru foin lalais ne’e.
Notisia relevante : https://radiosuai.blogspot.com/2023/12/apa-maukatar-kestiona-servisu-ops-la.html
Entertantu Komandante PNTL Covalima husu ba sidadaun hotu karik OPS sira ne’ebé destaka iha suku maka hala’o servisu ladun di’ak tenki hato’o keixa ka evidensia ruma ba iha komandu munisipiu hodi hatene tuir no labele husik lerek hodi ko’alia deit iha kotuk. Komandnte ne’e mos husu ba OPS hotu tenki hala’o servisu ho profesional hodi atende komunidade iha suku hotu dignu.
Jornalista : Julio Salinas
Editor : Chamot Nahac
