Covalima (RCCT) 09-10-23–Autoridade iha Munisipiu Covalima kompostu husi Adminstrador Munisipiu Covalima, Francisco de Andrade, Komandante Polisia Nasional Timor-Leste (PNTL) Munisipiu Covalima, Superientendente Polisia Calisto Gonzaga inklui diretor servisu Munisipais Balu, akompaña Chief Executive Officer (CEO-Sigla English) kompaña Timor Holding, partisipa iha serimonia inaugura uma fatin ba jogu kasino (Slot Mesin) iha Covalima ne’ebé lokaliza iha bairu Santa Rosa, Suku Debos, Postu Administrativu Suai.

Partisipa iha serimonia Inaugurasa ne’e, Administrador Munisipiu Covalima Francisco de Andrade agradese ba kompaña Timor Holding basa bele halo reabilitasaun ba uma ne’ebé uluk bolu naran uma feto (gedung wanita) oras nakfilak ona sai uma luxu fatin ba jogu kasino (Slot Mesin) hodi bele fo arendamentu ba estadu.

“Ha’u nia prezensa mai iha ne’e primeiru atu fo agradese ba Timor Holding halo reabilitasaun uma ne’e sai luxu iha Covalima, parese primeiru ves uma ne’e mak sai luxu, nia benefisiu barak, primeiru nia sei halo arendamentu ba estadu no sei fo servisu ba Covalima oan sira” informa Administrador Munisipiu Covalima Francisco de Andrade jornalista sira hafoin remata iha serimonia inagurasaun ba jogu kasino iha Santa Rosa Suai.

Chief Executive Officer (CEO-Sigla English) Timor Holding, Lorenço de Oliveira konsidera jogu kasino ne’ebé loke iha Covalima hanesan divertimentu ida hodi hatama reseitas ba estadu.

“Ohin halo abertura lansamentu iha Suai tanba divertimentu ida ne’e mos bele hatama osan ba kofer estadu, nia prosesu tanba iha lisensamentu hatun mai ne’e ita tenke selu taxa pursentu 25, tenke selu taxa ba nasaun no pursentu 15 selu ba sosial ne’e mos selu hotu ba estadu, selu ba sosial maka hanesan atividades desportu ruma iha Covalima, bele uza hodi tulun ema kiak ruma bele hasai husi orsamentu ida ne’e liliu ba iha pursentu 15 nian ne’e” nia informa.

Komandante PNTL Munisipiu Covalima, Superientendente Polisia, Calisto Gonzaga, dehan kompaña ne’ebé loke jogu iha Covalima mak hetan autorizasaun husi inspetor de jogus signifika kompaña iha validade lisensa, tan ne’e hanesan autoridade seguransa prontu fo seguransa ba ema ne’ebé hakarak atu jogu iha fatin ida ne’e.

“Ha’u hanoin kompaña ida ne’e hetan autorizasaun husi inspetor de jogu signifika katak kompaña iha validade, nia iha lisensa ona para atu bele loke iha ita nia munisipiu, hanesan autoridade seguransa ha’u garante ba seguransa sira ne’ebé ema lubun ida maka mai halo jogu ka mai halimar iha ne’e ha’u iha obrigatoriu atu bele halo prevensaun, maibe intermos sira seluk ha’u labele fo komentariu tanba ha’u hatene nia iha lisensa, governu lokal mos autoriza hela nia iha ne’e, ha’u hanesan parte seguransa iha obrigatoriu atu bele fo seguransa” nia dehan.

Entertantu tuir Administrador Munisipiu Covalima dehan uma feto Covalima ne’ebe uluk hanesan fatin ba lixu no animal halimar fatin agora nakfilak ona ba uma luxu depois kompaña timor holding halo reabilitasaun hodi uza ba fatin jogu kasino (Slot Mesin) iha Covalima.