Covalima (RCCT) 22-09-23–Diretór Servisu Alfandega iha Fronteira Postu Integradu Salele, Nuno Nogueira dehan, Sasan Importadu tama husi liu husi Alfandega laiha ida mak kontra bandu. Jerente Autoridade Aduaneiru iha Covalima dehan lia ne’e relasiona ho ekipa konjuta ne’ebé iha loron 14 to’o 15 fulan setembru ne’e, halo aprensaun no inspesaun ba sasan importadu ne’ebé rebista hetan Plastiku saka 90 ne’ebé tama husi fronteira Salele liu dalan legal iha loron 13 fulan, maibe tuir Servisu Alfandega nian, Plastiku ne’e kategoriza ba importasaun ho metodu kondisional katak bele halo importasaun maibe tenki hetan lisensa husi Ministeriu Komersiu no Industria.
Diretór Nuno esplika, Tuir dekretu 87/2022, ko’alia konaba Kodigo Aduaneiru, instutuisaun seluk bele halo intervensaun ba merkaduria ne’ebé liu ona husi Prosesu tomak Alfandega iha fronteira ne’ebe tama ona ba rai laran, liu ona Kilo Metru (KM) 10, maibe tenki iha despaixu ruma husi Ministeriu Publiku (MP) ba merkaduria ka sasan ne’ebé tama tuir kategoria natureza krime ou problema seluk husi sasan importadu ne’e.
“Tuir dekretu lei numeru 87/2022 kodigu Alfandega nian hateten katak merkaduria ne’ebé tama, Alfandega halo ona nia servisu iha fronteira ne’e kuandu liu ona kilometro 10 ba rai laran, ne’e instituisaun seluk nia servisu, karik instituisaun seluk maka interven iha laran tenki iha despaixu ruma husi Ministeriu Publiku ba merkaduria ne’e ho kategoria krime ka ou problema ruma iha sasan sira ne’ebé importa” informa Diretór Servisu Alfandega Munisipiu Covalima, Nuno Noqueira.
Nia Klarifika, Laiha sasan kontra bandu mak importa liu husi fronteira, maibe relasiona objetu plastiku ne’ebé tama liu husi fronteira Postu Integradu Salele ne’ebé Ekipa konjuta halo aprensaun iha loron 14 no 15 foin lalais ne’e kategoriza ba importasaun metodu ho kondisional ne’ebé tenki iha lisesan husi Ministeriu Komersiu no Industria katak bele importa, ida ne’e la bandu.
“Ha’u hakarak atu informa ba publiku katak kuandu sasan tama liu husi fronteira ne’e laiha sasan ida ne’ebé kontra bandu, konaba objetu plastiku dadauk ne’e ita labandu maibe ho nia metodu ida Alfandega bolu katak kondisional, importasaun ho konsidisional ne’e katak tenki iha autorizasaun husi Ministeriu Komersiu no Industria mak foin bele importa, katak la bandu” nia dehan.
Entretantu hatan ba lamentasaun CCI nian konaba Alfandega nia servisu iha Fronteira Salele La Masimu, Diretór Alfadenga Covalima deklara sei esforsu atu hadi’a di’ak liu tan servisu hotu, liu husi ajudu ekipamentu no investigasaun ba pesoal sira ne’ebé involve direta ba verifikasaun ba merkaduria ne’ebé tama mai iha loron 13 fulan setembru foin lalais ne’ebé dadaun asegura iha komandu PNTL Covalima hahu iha loron 15 fulan setembru ne’e hodi hein prosesu kontinuasaun.
Jornlista :JS
Editor : CN
