.png)
COVALIMA (RCCT) 13-12-23—Iha Mandatu Governasaun da Sia, liu husi Sekretaria Estadu ba Igualdade (SEI) iha programa integradu hodi hakbi’it feto sira atu bele foti desizaun.
Pontu Fokal SEI Munisipiu Covalima Francisco T.G. de Araujo, hatete iha Sekretariu Estadu Igualdade (SEI) mai ho nia programa ida atu hakbi’it no valoriza feto sira bele brani foti desizaun iha kualker tempu.
“Iha biban ne’e atu hatete ba ita hotu katak Sekretariu Estadu Igualdade iha mos nia programa ida atu bele hakbi’it partisipasaun feto liliu iha nivel foti desizaun sira, tanba ne’e mak durante ne’e atividade barak ne’ebé ita halo ona liliu iha ita nia Munisipiu Covalima ita mos fo formasaun ba feto potensial sira, iha ita nia Munisipiu Covalima iha mos assosiasaun feto potensial, ne’ebé ita nia assosiasaun ida ne’e harii iha tinan 2014, iha iha assosiasaun ida ne’ebé bele halibur feto Covalima atu bele tau forsa hamutuk, tau hanoin hamutuk hodi halo advokasia di’ak liu ba iha nesesidade feto nian” informa Pontu Fokal SEI Munisipiu Covalima Francisco T. G. de Araujo iha nia intervensaun ba Komemorasaun loron Feto Nasional Timor-Leste ba dala 47 ne’ebé hala’o husi Sekretariu Estadu Iguakdade iha Salaun enkontru Postu Administrativu Maucatar, Tersa (12/12/23).
Nia afirma SEI mos apoiu fundus ba grupu feto sira hodi hala’o atividade negosiu atu nune’e bele hetan rendimentu di’ak ba sustenta vida familia nian.
“Atividades seluk ne’ebé ami halo fo mos apoiu fundus ba iha grupu feto sira liliu ne’ebé maka iha inisiativa hakarak loke kios, hakiak modo, hakiak animal no atividade sira seluk, ne’e atividade ida ne’ebé durante ne’e ami halo atu bele hakbi’it feto sira, husi apoiu fundus ida ne’e nia objetivu maka atu bele inan feton sira bele iha independensia rasik ba vida negosiu nian, atu nune’e ita boot sira iha rendimentu bele kontribui ona hodi sustenta ita boot sira nia ekonomia familia uma laran” nia dehan.
Entertantu durante ne’e iha Munisipiu Covalima, SEI fo kapasitasaun ba feto sira nune’e hakbi’it partisipasaun feto liliu iha nivel foti desizaun ba koleker dezenvolvimetu.
Jornalista : Julio Salinas
Editor : Chamot Nahac
