COVALIMA——Vendedor iha merkadu Debos, Suai, husu governu liliu ba iha Serbisu Jestaun Merkado no Turismu Munisipiu Covalima (SJMTMC) atu halo manutensaun ba kondisaun uma naruk rua iha merkadu laran tanba kondisaun uma refere daudaun ne’e ai balun komesa lahuk, kalen sira balun kuak ona.
Negosiante Aquilina Amaral, informa uma naruk rua ne’ebe iha merkadu laran uza tinan barak ona maibe to’o agora seidauk iha instalsaun lina eletrisidade halo negosiante sira hela deit iha nakukun laran.
“Ami hanesan povu hakarak husu ajuda ba ukun nain sira se karik governu hadomi tebes nia povu iha rai Suai ida ne’e ajuda tau netik matan ba ami iha merkadu laran ida ne’e, se bele ajuda hadi’a tiha ami nia kalen iha leten restu husi ahi han agora ami sei kontinua uza nafatin, inklui mos ami ne’ebe fa’an sasan iha uma naruk rua ne’e durante tinan barak nia laran ona tuur iha nakukun hela tanba ahi sei dauk” informa Reprezenta Negosiante, Aquilina Amaral ba jornalista RCCT iha Merkadu Debos, Kinta (25/05).
Nia hatete eletrisidade sei dauk instala ba uma naruk iha merkadu Debos halo nagosiante sira iha tempu kalan tuur nakukun hodi hein sosa na’in sira bainhira atu sosa modi ou bua ho malus no produtu sira seluk, no durante negosiante balun dada ahi husi negosiante sira seluk ne’ebe maka instala lina eletrisidade ona maibe labele uza lampu barak liu uza deit lampu ida.
Aquilina haktuir nia parte hala’o atividade fila liman iha merkadu Suai hahu kedas iha tinan 2004 mai to’o ohin loron maibe tuir nia kondisaun merkadu Debos, Suai laiha mudansa, tan ne’e hakarak husu ba governu atu kria kondisaun ida ne’ebe diak ba povu kiik sira hodi buka moris iha merkadu, tan bainhira kondisaun ladiak maka povu ninia produtu sira ne’ebe fa’an iha merkadu ema sei labele sosa.
Nune mos Xefe Suku Debos Agustinho da Silva, husu ba Serbisu Munisipal Jestaun Merkado no Turismu Munisipiu Covalima, atu tau planu hodi kria kondisaun dignu ba uma iha merkadu Debos, tanba uma sira iha ne’e uza kleur ona no kondisaun mos komesa at ba beibeik.
“Hau hanoin husu governu liliu diresaun serbisu jestaun merkadu no turismu munisipiu ninian tenke halo manutensaun ba fatin ne’ebe risku hodi ameasa ba komunidade sira buka moris iha merkadu tanba kondisaun ai balu lahuk no kalen balu kuak” nia dehan.
Nia haktuir, nudar autoridade lokal hakarak hato’o ba diretor jestaun merkadu munisipal ninian tenke kria kondisaun ida ne’ebe diak, merkadu ida ne’ebe kleur loos ona, ai sira komesa dodok no lahuk ona ne’e presija hadi’a no mos instala mos ahi atu nune’e komunidade sira fila liman iha merkadu ne’e bele kontente tanba naroman.
Nia dehan kuandu ahi eletrisidade la tama bele fo risku ba komunidade fa’an sira nia produtu iha merkadu ida ne’e.
Hatan ba preokupasaun ne’e tuir Director Serbisu Jestaun Merkado no Turismu Munisipiu Covalima (SJMTMC), Vitorinho do Carmo, hatete sei halo atentementu tuir kapasidade ne’ebe iha no sei kordena ho EDTL atu dada eletrisidade ba uma naruk rua ne’ebe durante ne’e ahi sei dauk tama.
“Hanoin ho preokupasaun komunidade nian ne’e ita tau ona planu no sei kordena parte EDTL munisipiu atu mai istala ahi ba uma naruk rua ne’ebe durante tinan barak nia laran ahi sei dauk tama, alende ne’e mos ita sei kordena mos ho parte BTL munisipiu oinsa atu bee mai iha merkadu refere” nia esplika.
Entertantu merkadu suai harii kedas iha okupasaun Indonezia merkadu refere ahi han motuk total no to’o fali era ukun rasik an ida ne’e iha loron 11 fulan marsu tinan 2014, akontese insendio hodi sunu motuk merkadu debos maibe to’o ohin loron governu sei dauk halo manutensaun, tan ne’e ai no kalen sira ne’ebe ahi han la hotu sora ne’e mak sei kontinua vendedor uza hodi hamahon an ba.(Azu)
