Covalima (RCCT) 15-08-23–Oras ne’e daudaun munisipiu-4 hanesan Munisipiu Oekusi, Bobonaro, Covalima no Ainaru maka priense ona kriteria hodi estabelese Confederasaun Desportu Timor-Leste.
Vise Prezidente Confederasaun Desportu Timor-Leste, Inocencio Araujo da Silva ba jornalista sira iha Salaun enkontru Postu Administrativu Suai, hateten hafoin priense ona kriteria husi assosiasaun desportu 7 ba leten maka ba tinan ida ne’e fo prioridade ba munisipiu-4 hodi estabelese CDTL.
“tuir avaliazaun husi CDTL rasik haree katak ne’ebe priense kriteria husi asosiasaun 7 ba leten, iha tinan ida ne’e husi rejiaun espesial administrasaun Oekusi estabelese ona CDTL, mai iha Bobonaro mos estabelese ona, agora mai Covalima hahu estabelese daudaun tanba iha asosiasaun desportu hamutuk 9 no kontinua ba estabelese tan iha Ainaro” informa Vise Prezidente Confederasaun Desportu Timor-Leste, Inocencio Araujo da Silva.
Prezidente Asembleia Confederasaun Desportu Timor-Leste Munisipiu Covalima Augusto Hendrique dehan ohin loron sai pajina foun ida ba Covalima tanba priense ona kriteria hodi estabele CDTL .
“Ohin ita halo pajina foun ne’ebe hakerek iha jornada confederasaun munisipiu Covalima hodi estabelese CDTL hafoin priense kriteria husi nasionl” dehan Prezidente Asembleia Confederasaun Desportu Timor-Leste Munisipiu Covalima Augusto Hendrique
Prezidente Boxing Munisipiu Covalima, Zacarias do Carmo, mehi hakarak harii Boxing iha Covalima hodi evita problema no bele halibur joven sira hodi halo kompetisaun iha boxing nune’e bele promove joven Covalima nia talentu liu husi boxing.
“Ita iha mehi hakarak harii Boxing iha Covalima tanba iha tempu okupasaun Indonesia nian mos Covalima iha Boxing, liu husi mehi ida ne’e hakarak promove joven Covalima oan sira ne’ebe iha talentu ba boxing” nia esplika.
Entertantu ba Munisipiu Covalima rasik priense ona kriteria liliu ba iha assosiaun desportu 7 maka hodi bele estabelese ona CDTL Covalima, tanba tuir kriteria kada munisipiu ida teneke iha assosiasaun 7 ba leten maka bele estabelese CDTL maibe ba munisipiu sira seluk sei labele estabele CDTL tanba sei dauk priense kriteria.
Jornalista : JS
Editor : CN
