Covalima (RCCT) 09-02-24-Ministeriu Solidariedade Sosial no Inkluzaun liu husi Servisu Sosial Inkluzaun Munisipiu Covalima, Klibur Dezenvolvimentu Sustentavel Timor Oan (KDSTO) Munisipiu Covalima kontinua fo tulun ba Ema ho Difisiensia (EhD) iha Suku Lour, Postu Administrativu Zumalai, Munisipiu Covalima.
Diretór Ezekutivu Klibur Dezenvolvimentu Sustentavel Timor Oan (KDSTO) Munisipiu Covalima Alfredo do Santos, Iha Postu Administrativu Zumalai KDSTO fo apoiu nesesidade baziku ba Ema ho Difisiensia (AhD) hamutuk na’in 36, apoiu ne’e tuir k’bit ne’ebé MSSI Covalima iha.
“objetivu prinsipal ne’e mak atu dehan ita apoiu sira hodi tulun netik sira ba loron ida ka rua nian no sira bele konsumu netik, maibe iha limitasaun bo’ot ida mai ita, sei limitasaun hela, entaun buat ne’ebé maka nesesariu ami bele halo hodi tulun sira, ami husu apoiu ba iha Ministeriu Solidadriedade Sosial Munisipiu Covalima servisu hamutuk Pontu Fokal Raes Hadomi Timor Oan (RHTO) Covalima. Apoiu sasan ne’e la signifika katak sasan ne’ebé ami apoia ne’e responde direita ba nesesidade loro-loron lae, maibe ida ne’e hanesan apoiu imediata bainhira ami rekolla ona dadus.” esplika, Diretór Ezekutivu Klibur Dezenvolvimentu Sustentavel Timor Oan (KDSTO) Munisipiu Covalima Alfredo do Santos, ba jornalista sira hafoin remata distribui nesesidade baziku ba ema ho difisiensia na’in 36 iha Suku Lour, Postu Administrativu Zumalai, Sesta (09/02).
Reprezenta Administrador Postu Administrativu (APA) Zumalai, Martinho dos Santos, apresia ho organizasaun KDSTO no MSSI Covalima ne’ebé fo ona apoiu nesesidade baziku hanesan fos ba ema ho difisiensia iha Suku Lour.
“Hanesan autoridade postu, sente kontente ho ajudasaun ne’ebé bele mai ajuda ami nia komunidade iha Postu Zumalai, Suku Lour, liliu ba benefisariu sira ne’ebé moris ho kondisaun difisiensia, iha biban ne’e mos hakarak hato’o ba inan aman sira katak loloos hanesan ne’e bele lori direita maluk sira ne’ebé difisiensia maka mai simu sasan direita husi KDSTO no MSSI Covalima labele inan aman maka reprezenta fali ne’e ladi’ak, tanba ne’e karik ba oin sei iha tan ajudasaun hodi organizasaun sira balu ba ema ho difisiensia di’ak liu inan aman sira lori sira na’in maka mai simu direita deit, tan ne’e hanesan reprezentante autoridade iha postu Zumalai hakarak fo agradese ba ajensia sira ne’ebé maka bele ajuda ami nia komunidade iha Postu Zumalai” nia dehan.
Benefisariu Difisiensia Matan Cornelio de Araujo, apresia ho apoiu ne’e maibe nia husu ba KDSTO no MSSI, iha futuru bele apoiu mos mina, supermi no sasan sira seluk.
“Ami sente kontente ohin ami simu ona fos, tan ne’e ho ajudasaun ida ne’e atu bele kontinua nafatin, maibe ba futuru hakarak atu ajuda ami labele fos mesak deit bele fo mos ho mina, supermi no sardina no sasan sira seluk ne’ebé ami presija” nia infirma.
Entertantu fos ne’ebé KDSTO fo ba EhD iha Zumalai hamotu saku 36 ho kilor grama 25, ne’ebe hetan Apoi husi Ministeriu Solidadiedade no Inkluzaun Munisipiu Covalima.
Editot : Chamot Nahac
