Covalima (RCCT) 26-12-23—Tersa ne’e, Ministra Solidadriedade Sosial no Inkluzaun (MSSI), Verónica das Dores fahe prezente natal ba ema ho difisiente sira iha Munisipiu Covalima.
Ministra Solidadriedade Sosial no Inkluzaun, Verónica das Dores hatete governu kada tinan hala’o atividade karidade ba ema difisiente, vizita dadur sira iha prizaun no halo vizita mos ba maluk sira ne’ebé hela iha uma maho, Governante ne’e saran dehan vizita ne’e hanesan prezente natal ida ne’ebé governu liu MSSI fo hodi sustenta moris ba badak.
“Governu iha nia planu rasik vizita kuandu iha fin do ano besik natal sira baibain halo kedas natal hamutuk ho maluk prizoneru sira, vizita uma mahon sira, vizita mos maluk difisiente sira, hahan uitoan laos barak fo ba maluk sira para han dala ida nian deit laos barak, ami hakarak hato’o ami nia profundu, hato’o ami nia natal kmanek hamutuk ho sira mesmu ho sasan sira ne’ebe ki’ik ne’e, ami hakarak vizita no haree duni sira nia kondisaun taba uluk hau servisu iha sentru nasional reabilitasaun ne’ebe maluk sira ne’e hau hatene sira ami nia difisientes sentri sosial ninian maibe ohin hau mai hanesan ministra fahe simbolikamente hahn uitoan ba sira bele sira lori ba han dala ida deit” informa Ministra Solidadriedade Sosial no Inkluzaun, Verónica das Dores ba jornalista sira hafoin distribui prezente natal ne’e ba difisiente sira iha Sede Suku Kamanasa, Postu Administrativu Suai, Munisipiu Covalima.
Iha fatin hanesan Emilio Amaral, ho kondisisaun Difisiente Matan kontente no agradese ba governu liu husi Ministeriu Solidadriedade Sosial no Inkluzaun ne’ebé mai Covalima hodi fahe hahan ba ema ho difisiente sira.
“Ohin loron tempu diak, loron kmanek ba ita hotu, agora tama ho rekijiaun dehan katak sira mai ne’e laos sira nia hakarak maibe sira mai hanesan milagre ida ba ami difisiente sira, kleur ona mak lia fuan ida ne’e hau buka, agora hau foin hetan iha fulan dezembru ida ne’e, ne’ebe sira mai vizita ami sente kontente tebes no agradese tanba ohin tempu diak mak governu liu husi MSSI mai fahe ne’e hahan uitoan mai ami” Emilio agradese ba MSSI.
Entertantu prezente natal ne’ebé Ministra Solidadriedade Sosial no Inkluzaun, Verónica das Dores fahe ba ema ho difisiensia sira iha Covalima ne’ebé hala’o iha Sede Suku Kamanasa mak hanesan fos saku ida, mina tein (mina goreng), susu ben, susu dancow, supermi no seluk tan, engkuantu benefisiariu difisiente sira ne’ebé hetan prezente natal ne’e hamotuk ema na’in 90, mai husi suku tolu mak hanesan Suku Kamanasa, Debos no Suku Matai.
Jornalista : Julio Salinas
