Covalima (RCCT), 30 Outubru 2026 — Ministériu Solidariedade Sosiál no Inkluzaun (MSSI), liuhusi Sentru Solidariedade Sosiál no Inkluzaun (CSSI) Munisípiu Covalima, distribui asisténsia umanitária iha forma foos ba família vulnerável na’in-158 iha Postu Administrativu Tilomar, Munisípiu Covalima, hodi responde ba nesesidade bázika no apoiu família sira ne’ebé enfrenta situasaun vulnerabilidade sosiál.
Benefisiáriu sira kompostu husi feto faluk, labarik vulnerável, ema katuas no ferik, ne’ebé hela iha suku haat, ho distribuisaun hanesan: Suku Beiseuk família na’in-44, Suku Kasabauc na’in-30, Suku Lalawa na’in-38 no Suku Maudemu na’in-46.
Diretór Sentru Solidariedade Sosiál no Inkluzaun (CSSI) Munisípiu Covalima, Agapito Assis, informa katak asisténsia umanitária ne’e nu’udar programa prioridade ida husi MSSI, ne’ebé iha objetivu atu responde ba nesesidade no preokupasaun komunidade vulnerável sira, inklui grupu sosiál ne’ebé presiza atensaun no apoiu espesiál husi Estadu.
“MSSI nia programa prioridade ida mak asisténsia umanitária. Programa ne’e sai prioridade tanba ita iha situasaun balu, liuliu iha komunidade sira ne’ebé konsidera vulnerável, inklui maluk sira ho defisiénsia, inan sira ne’ebé abandona, aman sira ne’ebé dala ruma hela mesak, labarik sira no feto sira ne’ebé sai vítima, ne’ebé mós hetan apoiu husi Ministériu Solidariedade Sosiál,” nia esplika.
Agapito Assis hatutan katak distribuisaun asisténsia umanitária ba família na’in-158 ne’e bazeia ba proposta no pedidu husi Administradór Postu Administrativu Tilomar, ne’ebé hato’o preokupasaun husi xefe suku no komunidade ba CSSI, atu transmite ba MSSI hodi hetan resposta.
“Bazeia ba proposta no pedidu husi Administradór Postu Tilomar, no bazeia ba preokupasaun husi xefe suku sira no komunidade, ita hato’o informasaun ba malu liuhusi APA, husi sentru ita hato’o ba Ministériu. Excelénsia Ministru ho Vise-Ministru responde ba situasaun ida-ne’e iha Tilomar ohin. Total família hamutuk na’in-158 husi Suku Beiseuk, Kasabauc, Maudemo no Lalawa, ho mane na’in-52 no feto na’in-106. Tanba ne’e mak ohin ita mai responde ba preokupasaun ne’ebé inan-aman, oan sira no maluk sira enfrenta,” nia afirma.
Iha parte seluk, Administradór Postu Administrativu Tilomar, Venansio Sarmentu, husu ba xefe suku, xefe aldeia no apoiu administrativu suku atu kontinua halo identifikasaun no avaliasaun ho justisa, transparénsia no ekidade ba família vulnerável sira, hodi asegura katak asisténsia umanitária bele to’o ba família hotu ne’ebé presiza.
Nia mós enkoraja lideransa lokál sira atu rejista naran família sira ne’ebé seidauk konsege hetan asisténsia iha distribuisaun ne’e, atu bele konsidera iha distribuisaun tuirmai no evita benefísiu ne’ebé la fahe ho hanesan ba komunidade.
“Husu nafatin ba xefe suku sira, xefe aldeia no apoiu suku atu haree maluk sira ne’ebé ohin la konsege hetan asisténsia, anota sira nia naran, atu karik tinan oin sira mós bele kontinua hetan. La bele família ida de’it mak fulan ida hetan dala rua ka tolu, tanba família balu bele sente diskriminasaun. Tanba ne’e mak ha’u sempre hatete katak bainhira imi identifika, tenke halo balansu atu sira hotu ne’ebé ohin la hetan bele hetan iha tempu oin,” nia husu.
Asisténsia umanitária ne’ebé distribui iha atividade ne’e inklui foos ho kuantidade kilogram 25 ba kada família benefisiária. Ho nune’e, família vulnerável na’in-158 simu apoiu atu ajuda responde ba nesesidade ai-han iha sira nia moris loroloron.
Jornalista: J. Correia
Editor: Paul Mandeu
