Covalima (RCCT), 29 Outubru 2026 — Komandu Polísia Nasionál Timor-Leste (PNTL) Munisípiu Covalima sei hametin seguransa durante selebrasaun Loron Finadu, iha 2 Novembru 2026, hodi garante komunidade sira bele presta omenajen ba matebian sira ho dame no seguransa.
Komandante PNTL Munisípiu Covalima, Superintendente-Xefe Polísia Paulo do Carmo Ferreira, hateten katak komandu halo ona preparasaun, inklui kontrolu iha pontu sira (check points), nu’udar medida preventiva atu kontrola movimentu tráfiku, liuliu bainhira komunidade husi munisípiu seluk no kapital Dili fila ba sira-nia knua.
“Komandu PNTL Munisípiu Covalima ho nia estrutura no membru sira hotu halo preparasaun. Agora, ita halo ona Chek Point nu’udar asaun preventiva, liuliu ba transporte motor no kareta sira, inklui komunidade husi munisípiu seluk no kapital Dili ne’ebé fila ba sira-nia knua,” nia dehan.
Nia hatutan katak Komandu PNTL Munisípiu Covalima prepara ona Planu Operasaun Seguransa, tuir diretiva husi Komandu Jerál PNTL. Planu ne’e inklui destakamentu membru sira iha fatin estratéjiku, liuliu iha símitériu sira ne’ebé komunidade sei vizita atu presta omenajen ba matebian sira.
“Ita iha planu operasaun seguransa ne’ebé Xefe Seksaun Operasaun PNTL Munisípiu Covalima sei hala’o, bazeia ba diretiva husi Komandu Jerál. Ita identifika ona símitériu sira ne’ebé komunidade sei ba presta omenajen ba matebian sira, no ita sei destaka ekipa seguransa iha fatin sira ne’ebé identifika ona,” nia esplika.
Paulo do Carmo Ferreira hatutan katak preparasaun ne’e konsidera mós esperiénsia husi selebrasaun tinan kotuk, liuliu movimentu ema no veíkulu ne’ebé aumenta bainhira komunidade lori ai-funan ba símitériu.
Planu operasaun ne’e sei envolve membru PNTL iha Komandu Munisípiu Covalima, ho apoiu husi Bataliaun Orden Públika (BOP), Unidade Patrullamentu Marítima (UPM), Unidade Polísia Fronteira (UPF) no membru F-FDTL.
“Planu Operasaun Seguransa ne’e sei envolve membru sira hotu iha Komandu PNTL Munisípiu Covalima, inklui ekipa apoiu siguranda husi BOP, UPM, UPF no kolega sira husi F-FDTL,” nia afirma.
Nia informa tan katak PNTL sei aplika alerta 1 hahú husi loron 1 to’o 3 Novembru 2026, ho membru sira hala’o servisu durante oras 24 atu asegura seguransa públika.
Aleinde preparasaun operasionál, PNTL Munisípiu Covalima halo mós kontrolu edukativu ba motorista sira, hodi enkoraja sira kondús ho kuidadu, kumpre regra tráfiku, uza kapasete no lori dokumentu veíkulu nian ne’ebé kompletu.
“Membru hotu sei tama servisu durante oras 24 atu asegura seguransa iha Loron Finadu. Ita mós halo ona kontrolu edukativu ba motorista sira, atu lori veíkulu ho kuidadu, la lori ho velocidade aas liu, uza kapasete no asegura dokumentu kareta ka motor nian kompletu,” nia dehan.
Komandante PNTL Munisípiu Covalima, Superintendente-Xefe Polísia Paulo do Carmo Ferreira, enkoraja komunidade hotu atu kolabora ho autoridade sira hodi mantein dame, pás no estabilidade durante selebrasaun Loron Finadu, atu ema hotu bele presta omenajen ba sira-nia matebian ho liberdade no seguransa.
Jornalista: J. Correia
Editor: Paul Mandeu
