Covalima (RCCT ) 04-09-24 Minsteriu Solidaridade Sosial no Inkluzaun (MSSI) liu Sentru Solidariedade Sosial Covalima fo apoiu ai han no la’os aihan ba oan ki’ak hamutuk na’in sanulu resin (12) iha Aldeia Galitas, Suku Thasilin Postu Administrativu Zumalai.

Reprezentante Sentru solidariedade Sosial Covalima, Nelson de Jesus hatete apoiu nesesidade baziku ne’e hala’o bazeia ba asesmentu ne’ebé tekniku sira sira hala’o iha terenu no mos pedidu mai husi Xefe Aldeia sira.

“Ohin loron MSSI mos ho nia papel ida atu hare liu ba iha familia Vulnarabel, liliu ba oan ki’ak sira mos, tanba ida ne’e mak MSSI hamutuk ho Administrador Postu Zumalai ohin loron ita mai apoiu ai han no la’os aihan “food item no non food item” ba ita nia oan  sira iha hamutuk uma kain 5 ho benefisiarius na’in 12, sasan sira mak hanesan fos ,susu ben ,danko,deho,tasu sanan, sinelus, sabaun, pasta dentes, bitit no seluk seluk tan” Reprezentante  Sentru Solidariedade Sosial Nelson de Jesus hatete.

Iha fatin hanesan Reprezentante Administrador Postu Zumalai Martinho Moniz dos Santos husu Minteriu Solidariedade Sosial no Inklusaun atu kontinua fo apoiu ba oan kiak sira ne’ebe seidauk hetan tulun iha postu administrativu zumalai.

“Hanesan autoridade postu ami senti kontenti apoiu ne’e, husu nafatin MSSI atu bele nafatin ajuda ba ami nia povu no ba ami nia komunidade k’bit laek sira no oan ki’ak sira, ami nafatin husu MSSI Nasional no Munisipiu oinsa atu Tau matan Nafatin ami nia komunidade sira,” Martinho Moniz dos Santos, Reprezenta Administrador Postu Administrativu Zumalai hatete.

Entretantu MSSI liu husi Sentru Solidaridade Sosial Covalima Apoiu Aihan no La’os Aihan ba Komunidade Vulneravel uma kain lima ho oan ki’ak na’in sanulu resin rua ne’e iha Aldeia Galitas Suku Thasilin Postu Administrativu Zumalai. Ne’ebé akompaña husi Autoridade sira inklui xefe aldeia Galitas.

Jornalista : Alfredo Barreto

Editor       : Chamot Nahac