COVALIMA—-Diretór Nasional Orsamentu Jestaun Finansas Ministériu Saúde, Miguel Maria, hatete Ministériu Saúde realiza workshop nivel rejional ne’e ho objetivu ida hakarak atu kria planu prevee orsamentu kada sentru saude sira.
“Objetivu loloos ne’e prepara ita planu orsamentu datallamente kada sentru saude, tanba ita hakarak promove buat planeamentu husi baze” informa Diretór Nasional Orsamentu Jestaun Finansas Ministériu Saúde, Miguel Maria, ba jornalista sira hafoin partisipa iha workshop ne’ebe hala’o husi Ministeriu Saude ba nivel Rejional nian kona-ba planu mikro nivel sentru saude komunitaria ba Serbisu Munisipiu Aileu, Ainaro, Covalima no Manufahi, ne’ebe hala’o iha Salaun enkontru Eskola Sekundaria Geral Publika Suai, Tersa (11/04).
Nia afirma Ministeriu Saude realiza workshop ida ne’e hanesan halo ezersisiu rejionalmente ba profesional saude sira ne’ebe maka serbisu iha serbisu mumisipal saude no iha sentru saude sira ho nia estrutura.
Maibe tanba kestaun tempu maka partisipa iha workshop ida ne’e mai husi xefe sentru saude sira husi Munisípiu Aileu, Ainaro, Covalima no Manufahi purvolta ema na’in-10 resin tanba kada sentru saude ida reprezenta ema na’in-2.
Nia haktuir objetivu loloos ne’e prepara planu orsamentu detallu kada sentru saude, tanba MS hakarak promove buat ida planeamentu husi baze, katak nesesidade ne’e tenke identifika husi baze, xefe sentru saude sira jo nia ekipa maka hatene, sentru saude ida professional saude na’in hira, durante tinan ida sira planu atu halo vizita ba komunidade ne’e hira nune’e bele tau sira nia kustu liliu ba osan han no hemu nian ida ne’e maka MS nia hakarak.
Nia dehan alende ne’e sentru saude sira maka iha programa barak, maibe programa sira ne’e hotu tenke integra programa saude na familia, programa Tubercloze, programa HIV-SIDA, programa malaria, programa promosaun, edukasaun no mos moras la hadaet sira ne’e hotu tenke integra iha atividade ida para bele ekipa tun ba ne’e hanesan konpresivu halo tratamentu saude ba komunidade sira iha baze.
“Tanba ne’e hahu ita nia prosesu planeamentu husi nivel sentru saude, nune’e bainhira ita iha ona informasaun elabora ita nia planu orsamentu nivel nasional iha MS nian hodi submete mos ba planu no ita atu konsolida mos ho ita nia orsamentu tinan atual 2023 ho mos prepara ba pakote tinan fiskal 2024 nian ne’ebe foin lalais halo ona jornada planeamentu iha Ministériu Finansas lina ministériu hotu iha ne’eba, ne’e hanesan parte ida atu hahu ita nia prosesu sira ne’e” nia informa.
Nia afirma MS iha planu mikro maibe sei dauk kompleta didiak tanba momentu planu mikro ne’ebe halo ne’e bolu munisipiu hotu tun na iha nasional deit, maibe ida ne’e hakarak halo detallu tanba ne’e hakarak fahe rejiaun ne’e maka sentru sira sira husi rejiaun ida ne’e nian maka hanesan Aileu Ainaro, Covalima no Manufahi bolu sira mai tuur hamutuk hodi identifika sira nia programatiku sira.
Xefe Departamentu Programatiku, Saude Munisípiu Covalima, Agapito de Jesus Nunes, haktuir workshop ida ne’e integradu tebes ne’ebe kompostu husi Rejional ne’ebe partisipa husi Munisípiu Aileu, Ainaro, Manufahi no Covalima maka sai uma na’in, workshop ne’e atu hodi halo planu mikro ba atividade iha sentru saúde sira.
“Workshop nivel rejional realiza atu hodi halo planu mikro ba atividade iha sentru saúde sira, ho oportunidade ida ne’e ohin hala’o atividade ida ne’e foin primeiru ves ita konvida xefe sentru saude sira, official finansas sentru saude sira, official finansas munisipal sira mai hodi halo planu ne’ebe atividade direita, sira halo atendimentu direita nune’e atu hodi hatene sira nia orsamentu hira ba kada postu saude hira” nia esplika.
Agapito realsa fasilidade saude iha Munisipiu Covalima total fasilidade saide iha 31, kompostu husi Sentru Saude 7 no postu saude 24.
Diretóra Serbisu Saude Munisipiu Manufahi, Florencia Cortereal Tilman, konsidera workshop ida ne’e hanesan kada tinan MS hala’o iha nivel nasional maibe konvida deit diretor Serbisu saude munisipal sira, maibe ho workshop nivel rejional ida ohin ne’e hala’o tenke involve hotu xefe sentru saude hotu partisipa atu hodi halo mikro planu ba serbisu saude nian hodi atende komunidade iha baze.
“Workshop ida ne’e halo kada tinan maibe ami Diretóra sira maka ba iha Dili deit, maibe ohin ne’e halo hau tenke ho hau nia xefe departamentu sira ho planu finansas hotu-hotu mai atu halo planu mikro ba ami nia serbisu” nia informa.
Diretór Servisu Saúde Munisipiu Manufahi deklara husi Manufahi hamutuk ema na’in-12 maka partisipa iha workshop ida ne’e, kompostu husi sentru saude 4 ho nia finansas na’in-4 husi munisipiu mai ho xefe programatiku.
Nia kompromete katak wainhira partisipa iha workshop nivel rejional ne’e remata fila ba Manufahi sei kontinua haree fila fali atu nune’e bele Melora diak liu tan serbisu iha baze.
Entertantu partisipa iha workshop nivel rejiaun ne’e mai husi diretor munisipal 4 hanesan Aileu, Ainaro, Covalima no Manufahi, Diretór Nasional Orsamentu Jestaun Finansas Ministériu Saúde Miguel Maria, xefe sentru saude sira inklui ho sira nia xefe planu finansas sentru saude hotu no xefe planu finansas munisipal no xefe departamentu programatiku sira.(Azu)
