Covalima (RCCT), 25 Setembru 2026 – Ministériu Saúde (MS), liuhusi Direksaun Nasionál Nutrisaun no Direksaun Jerál Saúde Kuidadu Primária, komemora Loron Nasionál Nutrisaun no Semana Mundial Susu Been Inan ho atividade tolu iha Suku Beco, Postu Administrativu Suai, Munisípiu Covalima, sexta-feira (25/09).
Atividade sira ne’e inklui screening ba labarik sira, edukasaun kona-ba nutrisaun no kompetisaun kulinária entre grupu sira iha komunidade.
Diretora Jerál Saúde Kuidadu Primária, Elisabeth Leto Mau, hateten katak tema Loron Nasionál Nutrisaun tinan ida-ne’e mak “Hamutuuk ba Nutrisaun, Família Forte, Futuru Forte”, enkuantu Semana Mundial Susu Been Inan lori tema “Susu Been Inan, Investimentu Di’ak ba Jerasaun Saudável”.
“Loron Nasionál Nutrisaun no Semana Mundial Susu Been Inan importante tebes atu hasa’e konsiensia komunidade kona-ba nutrisaun di’ak, liuliu ba labarik no inan sira,” Elisabeth Leto Mau hateten ba jornalista iha Suku Beco.
Atividade screening ba labarik sira hala’o ho objetivu atu monitoriza todan no altura, hodi avalia sira-nia kondisaun nutrisionál no dezenvolvimentu.
Iha atividade edukasaun no advokasia, Ministériu Saúde fó orientasaun ba inan sira kona-ba oinsá atu prepara ai-han nutritivu ba labarik sira, liuliu liuhusi utilizasaun produtu lokál ne’ebé komunidade rasik kuda.
Elisabeth Leto Mau hateten katak konsumu produtu lokál bele ajuda família sira atu hetan ai-han nutritivu no prevene problema saúde ne’ebé relasiona ho nutrisaun.
“Labarik sira presiza ai-han nutritivu ne’ebé mai husi produtu lokál, tanba ai-han ne’ebé ita kuda iha to’os bele sai fonte nutrisaun di’ak ba família,” nia dehan.
Kona-ba Semana Mundial Susu Been Inan, Elisabeth mós fó hanoin ba komunidade, liuliu inan sira, kona-ba importánsia atu fó susu been inan de’it ba bebe sira durante períodu aleitamentu ekskluzivu, tuir rekomendasaun saúde.
Iha kompetisaun kulinária, Grupu Haburas sai promeiru lugar ho pontu 87,5, enkuantu Grupu Haforsa hetan segundu lugar ho pontu 78,2.
Kompetisaun ne’e avalia husi ekipa juri bazeia ba sabor, preparasaun no valor nutrisionál husi ai-han sira ne’ebé grupu sira prepara.
Vencedór sira simu premiu hanesan sanan, tasu, kaneka, buli no sertifikadu apresiasaun husi Ministériu Saúde.
Iha sorin seluk, reprezentante Prezidente Autoridade Munisípiu Covalima, Hilário Oliveira, hato’o apresiasaun ba Ministériu Saúde tanba programa ne’e konsidera importante ba komunidade.
“Selebrasaun Loron Nasionál Nutrisaun no Semana Mundial Susu Been Inan importante tanba liuhusi nutrisaun ita bele hadi’a kondisaun saúde no kresimentu labarik sira,” nia dehan.
Hilário Oliveira mós hateten katak rezultadu screening hatudu mudansa iha kondisaun nutrisionál labarik balun, ne’ebé hatudu katak esforsu husi família no komunidade iha área nutrisaun bele fó impaktu ba sira-nia kresimentu.
Nia enkoraja inan-aman sira atu kontinua uza produtu lokál no prepara ai-han nutritivu ba labarik sira, hodi apoia sira-nia kresimentu no dezenvolvimentu saudável.
Ministériu Saúde realiza atividade sira ne’e ho apoiu husi parseiru no autoridade lokál, ho objetivu atu hasa’e koñesimentu komunidade kona-ba nutrisaun, aleitamentu ho susu been inan no promosaun produtu lokál.
Jornalista: Paul Mandeu
