Covalima (RCCT) 18-02-25-Governu liu Ministeriu Planu Investimentu Estratejia (MPIE), hahu ona hal’ao sosializa konaba planu munisipal ordenamentu teritorial ba autoridade sira iha Covalima.
Iha Sosializasaun ne’e, Diretór Nasional Ordenamentu Espasial, Fertinal Alves, hatete autoridade lokal sira persija hetan esplikasaun konaba koseitu no baze engkuadramentu legal husi planu ordenamentu teritorial.
“Razaun ita presija planu ordenamentu teritorial iha Munisipiu Covalima ne’e katak ita atu hahu ninia prosesu elaborasaun ba iha planu refere, no importansia husi sosializasaun ne’e para atu esplika ba ita nia autoridade lokal sira, ita nia servisu munisipais, ita nia delegasaun teritorial no entidade relevante sira hotu iha Covalima saida maka planu ordenamentu ne’e rasik nia konseitu ka signifikadu sira, importansia saida maka planu ne’e sei lori mai iha ita nia Munisipiu Covalima inklui mos engkuadramentu legal, baze legal saida maka justifika ka determina ba iha ejistensia husi planu ordenamentu ne’e rasik” informa Diretór Nasional Ordenamentu Espasial, Fertinal Alves.
Iha fatin hanesan, Sekretariu Munisipal Planeamentu Investimentu no Dezenvolvimentu Integradu Munisipiu Covalima, Caetano dos Santos Ribeiro, konsidera sosializasaun ne’e iha benefisiu pozitivu tanba Munisipiu Covalima sei sai hanesan Zona Ekonomia iha futuru.
sosializasaun ida ne’e importante tebes, tanba ba futuru Covalima sei sai sentru industria ekonomia.
“Sosializasaun konaba elaborasaun, planu dezenvolvimentu munisipal ba Covalima, importante tebes tanba Covalima hanesan mos sentru zona ekonomia, tanba ne’e maka sosializasaun ida ne’e hanesan preparasaun ida, tanba wainhira Kamra Munisipal ita presija prepara rekursu umanu, tan ne’e maka formasaun ka sosializasaun ne’e pertenente tebes ba funsionariu sira liliu ba planu dezenvolvimentu husi 2025 ba 2026” nia dehan.
Sosializasaun Konaba ba elaborasaun planu ordenamentu teritorial ne’e hala’o iha Salaun Administrasaun Munisipiu Covalima ne’ebé partisipa husi Sekretariu Munisipal Planeamentu Investimentu no Dezenvolvimentu Integradu Munisipiu Covalima, Caetano dos Santos Ribeiro, diretór servisu munisipal no diretór delegasaun teritorial inklui Administrador Postu Administrativu sira iha Covalima.
Engkuantu, sosializasaun konaba planu munisipal ordenamentu teritorial ne’e sei hala’o mos iha postu administrativu hotu partenente iha Munisipiu Covalima.
Jornalista : Julio Salinas
Editor : Chamot Nahac
