Covalima (RCCT) 04-11-23—Mouzinho Amaral Re-Kandidatura no Paulo de Sena kandidatura ba Suku Labarai hodi kompete iha eleisaun suku segundu volta ba periudu 2023-2030, kandidatura na’in rua mai ho vizaun no misaun lahanesan maibe iha objetivu ida deit, hakarak halo dezenvolvementu iha suku labarai.
Kandidatura Mouzinho Amaral hatete kuandu povu Labarai fo nafatin fiar hodi kaer ukun ba tinan 7 mai tan maka sei dezenvolve Suku Labarai sai nabilan hanesan mos suku sira seluk iha Covalima, konaba dezenvolvimentu komunidade Labarai haree no sente ona saida maka nia halo durante tinan 7 nia laran ikus ne’e.
“Programa ne’ebé motiva ha’u sai nafatn hodi re-kandidatu ba suku, oinsa atu dezenvolve suku Labarai halo nabilan hanesan mos suku sira seluk iha Timor-Leste, ba Munisipiu Covalima espesial ba Postu Administrativu Suai, konaba dezenvolvimentu ha’u sente ita bo’ot sira haree no sente durante ha’u nia mandatu iha tinan 7 nia laran, oinsa atu dezenvolve primeiru proposta ne’ebé maka kada aldeia ida ne’e mai husi komunidade aldeia ida-idak ne’ebé hanaran enkontru asembleia aldeia, depois programa ida ne’e sei halo diskusaun iha Suku kada aldeia rekomenda lori proposta, ho ida ne’e mak bele rekomenda ba iha postu, no ba iha munisipiu” informa kandidatu Mouzinho Amaral liu husi programa talkshow ne’ebé hala’o iha sede Aldeia Holbelis, Suku Labarai, Sabadu ne’e.
Mouzinho esklarese konaba nia mandatu tinan 7 ikus ne’e mak nia halo dezelvolvementu iha suku liu hakbesik ba entidade hotu tantu sosiedade sivil no governu, oinsa komunidade bele asesu ba bee moos no hetan tratamentu saude ida ne’ebé di’ak ba komunidade sira.
“Hanesan xefe suku oinsa atu bele responde no dezenvolve ninia suku maka tenke hakbesik an ba sosiedade sivil, Organizasaun noun govermentais sira bainhira ita iha programa, ida ne’e maka ha’u bele hatete ezemplu ida katak durante ha’u nia mandatu iha tinan 7 ita nia governu rasik hanesan governu iha krize laran, tanba ne’e mak dezenvolvimentu ne’ebé la’o, esforsu ne’ebé ha’u halo mak hanesan hakbesik an ba iha kompaña internasional no kompaña nasional maka komunidade iha aldeia Holba bele asesu ba bee moos, tanba Suku Labarai suku ida ne’ebé hela iha vila no suku ida ne’ebé hela besik liu ba estrada ninin tan ne’e prioridade liu oinsa bele hetan bee moos no hetan saude ne’ebé di’ak, oinsa oan no alin sira bele hetan edukasaun ne’ebé di’ak, esforsu ne’ebé ha’u iha maka halo proposta rasik tuur hamutuk ho konsellu suku rezultadu hatudu ida iha Aldeia Bunuk, komunidade hetan bee moos ne’e ajuda husi kompaña Internasional Timor Resources” nia dehan.
Iha fatin ne’e, Kandidatu Paulo de Sena hateten. bainhira eleitu sei hahilas lisan kultura Suku Labarai, kria unidade iha suku laran no prontu atu servi suku Labaraii ho dignu, kontinua hatutan dezenvolvimentu ne’ebé durante ne’e la’o ona iha suku laran.
“ha’u mai ho moto ida katak ha’u tuur ho imi, la’o ho imi, mai ita hamutuk hahilas lisan kultura Labarai nian, ha’u nia vizaun primeiru maka kria unidade, neutralidade no honestidade, ha’u nia misaun maka prontu servi komunidade Suku Labarai ho digno, hametin no hatutan dezenvolvimentu ne’ebé maka lao iha Suku Labarai, promove valor kultura no servisu hamutuk ho solidu, dezenvolve edukasdaun popular hodi hasae juventude sira nia konesimentu iha area oi-oin” Paulo hatete.
Paulo haktuir karik povu suku labarai fo fiar eleitu mak sei kria planu hodi dezenvolve setor agrikultura no kria koperativa, halo reabilitasaun ba bee matan.
“sei dezenvolve setor agrikultura no grupu koperativa, reabilita bee matan ai horis iha ekolojia, fin do mes sei halo enkontru ho konsellu suku kada aldeia lima nia laran, hadi’a atendimentu administrasaun publiku no halo koperasaun ho ONG internasional no Nasional, ida ne’e maka ha’u ni misaun ho vizaun” nia dehan.
Entertantu Talkshow ba ho kandidatura Xefe Suku Labarai Paulo de Sena no rekandidatura Mouzinho Amaral ne’e hála’o iha Sede Aldeia Holbelis, ne’ebé organiza husi Asosiasaun Estudante Holbelis (AESTHOL) no Juventude sira husi suku Labarai. Nune’e mos partisipa iha Talkhow ne’e mai husi komunidade apoiante kadidatura Xefe suku na’in rua iha suku labarai.
Jornalista : Julio Salinas
Editor : Chamot Nahac
