Covalima (RCCT) 01-06-24—Moru protesaun iha Eskola Baziku Central (EBC) Thasilin ne’ebé konstrui husi Programa Nasionál Dezenvolvimentu Suku (PNDS) monu total kuaze metru 103 tanba impaktu husi akontese udan bo’ot Kinta feira loro kraik durante oras 3 nia laran iha Munisipiu Covalima.

Diretór Eskola Baziku Central Tashilin, Agustinho Freitas, informa moru protesaun eskola nian ne’ebé monu total ne’e, PNDS konstrui iha fulan Fevereiru tinan ne’e no seidauk entrega ba parte eskola.

“Moru ne’e hahu halo iha fulan Febereiru nia laran no remata konstrusaun iha fulan Maiu ne’e, moru ida ne’e mos sira husi nasional mai hare ona maibe entrega ba malu maka seidauk, ne’e maka bainhira udan bo’ot be sulin tun maka’as ba fondasi sira mos monu hotu, husi parte eskola oin iha estrada ne’e monu tanba be husi mota ne’e tun hodi ke’e halo moru ne’e monu tanba udan ne’e komesa husi leten ne’eba iha tuku 4 loro kraik to’o tuku 8 kalan udan la para” dehan Diretór Eskola Baziku Central Tashilin, Agustinho Freitas ba RCCT iha Tashilin Sesta (31/05).

Nia afirma relasiona ho moru eskola ne’ebé monu ekipa husi PNDS munisipiu Covalima tun direita hodi halo observasaun no konsege sukat moru ne’ebé monu iha metru 103.

“Sira husi PNDS mai ona hare no sukat tiha hirak ne’ebé monu iha 103 metru, tuir ha’u nia hatene katak moru ne’ebé monu ona sira prontu atu kontinuasaun halo konstrusaun foun ba moru ne’ebé monu ona” nia informa.

Entertantu tuir Diretór Eskola Baziku Central Tashilin, Agustinho Pereirra observa katak, uluk animal sempre tama no hafoer areador eskola, maibe depois PNDS konstrui moru protesaun, eskola infrenta dadaun ambiente saudevel hodi garantia saúde di’ak no hases estudante sira sira husi moras.

Enkuantu relasiona ho moru protesaun eskola Tashilin monu ne’e, RCCT seidauk hetan informasaun husi PNDS Munisipiu Covalima.

Jornalista : Julio Salinas

Editor       : Chamot Nahac