Covalima (RCCT) 13-03-23—Governu Liu husi Ministerio Obras Publiku (MOP) halo hela esforsu ba dezeñu ba Ponte Mota Maligirik iha Suku Ogues Postu Administrativu Maukatar ne’ebe halo ligasaun Munisipiu Covalima no Bobonaro liu husi Maukatar.
Ponte Mota Maligirik Kotu hafoin akontese udan bo’ot iha inisiu Fulan Februariu Tinan ne’e.
“Hanesan ohin ha’u dehan esforsu atu halo dezeñu, maibe inklui ida foin daudaun husi Bobonaro tun ba ponte Mali Queric iha Suku Ogues, Postu Administrativu Maucatar, Munisípiu Covalima nian ne’e mos ita tenta hela buka halo dezeñu ba ida ne’eba, entaun kondisaun ida ne’ebé maka emerjensia tanba foin daudauk akontese ita orienta duni para resolve” informa Ministru Obras Publika, Abel da Silva Pires, iha nia deskursu hafoin hala’o lansamentu ba Tore foun COO17 Telemor iha Covalima ne’ebe hala’o iha Aldeia Aitoun, Suku Fatululik Sesta (10/03).
Ministru Abel relata mos konaba ponte Lomea ne’ebé sempre ameasa kotuk bebeik tanba impaktu bainhira mota tun ho korenti ne’ebé maka’as.
“Ba ponte Lomea ne’e ita hakarak intervensaun ida ne’ebé permanente uitoan, tanba baibain nia kotu IGE ba ateru deit, tan ne’e udan, Mota tun sobu fali, agora ita tenke monta material ida ne’ebe tahan bee, ne’e agora ita produs hela iha Dili purvolta gasta ona orsamentu ho montante rihun $ 3 ona, soke ita sei dauk selu entaun defisil uitoan, ami halo hela negosiasaun kompañia ho Ajensia Dezenvolvimentu Nasional (ADN) verifika antes para ami bele foti balu hodi taka iha ne’eba, ne’e traipot taka iha ne’eba, semente ne’ebe ita konstrui para bele tahan bee labele mai sobu ne’e maka agora daudaun ita halo tanba ne’e maka kleur uitoan” Ministru Abel esplika.
Ministru Obras Públiku hatete konaba auto estrada ne’e iha ona tenderizasaun maibe tanba iha perguntas barak husi kompaña sira tanba ne’e maka prosesu ne’e dada naruk uitoan.
“Sim auto estrada tender tiha ona soke tanba iha pergunta barak husi kompañia sira ne’ebe partisipa iha ne’e, entaun prosesu ne’e dada naruk uitoan, tanba ita presija klarifikasaun hotu-hotu pergunta lubuk ida ita tenta hela atu resolve importante maka ne’e prosesu la’o daudauk ona” nia dehan.
Nia dehan resolve hotu ona sira ne’ebe monu ne’e tenke resolve hotu, naksobu ne’e mos resolve inklui pasajen ba populasaun sira iha Suku Matai halo ponte ba sira bele ultrapasa ho livre liu husi auto estrada, se lae sira hakur auto estrada bele difikulta sira no perigu ba sira nia moris, maibe husu ba komunidade Matai pasiensia hein uitoan lai tanb prosesu sei lao hela.
Jonalista : JS
Editor : CN
