Covalima (RCCT) 10-05-24-Hafoin halo sorumutu ho Prezidente Autoridade Munisipal (PAM) Covalima, Ministru Petróleu Rekursu no Minerais, Francisco da Costa Monteiro, kompromete katak iha semana rua ne’e nia laran ekipa husi nasional tun mai iha Covalima hodi harii bairu foun ba komunidade afetadu sira iha Holbelis, Suku Labarai, Postu Administrativu Suai.
Ministru Petróleu Rekursu no Minerais, Francisco da Costa Monteiro, hatete razaun atu harii bairru foun tanba ne’e povu nia direitu duni, no harii bairu foun ne’e urjentemente, tanba helikopter sira ne’ebé durante ne’e semo husi Dili ba iha tasi laran sei muda hotu mai iha Aero Portu Suai.
“Ko’alia konaba harii bairru foin Prezidente Timor Gap maka iha ne’e kedas, vise prezidente ho nia estrutura sira namanas loos kontratu la sala asina tiha ona, ne’ebe iha semana ida ka rua ne’e nia laran ema sei mai iha ne’e atu harii ona bairru foun ne’e, importante tebes tanba bairru foun ne’e hanesan nesesidade ida paralende sira nia direitu duni tanba ita presija realoka sira, maibe mos agora urjente uitoan tanba helikopter sira husi Dili nian ba tasi laran nian ne’e ami iha planu atu muda hotu mai iha ne’e, ne’e kedizerke sei iha atividades lubuk ida iha ne’e, ema sei presija akomodasaun ruma iha ne’e karik kareta ruma para apoiu ne’e atividades ekonomiku iha Suai komesa iha ona no buat sira seluk mos fas parte ba ami nia planu” Ministru Petróleu Rekursu no Minerais, Francisco da Costa Monteiro, deklara lia hirak ne’e iha sorumutu ho PAM Covalima ho nia estrutura tomak iha Administrasaun Munisipiu Covalima Sesta (09/05).
Ministru Petróleu Rekursu no Minerais, Francisco da Costa Monteiro, haktuir katak alende harii bairru foun tuir planu sei kontinua fila fali loke formasaun kursu lian ingles ba komunidade sira ne’ebe sai afetadu ba mega projetu.
“Ha’u nia asesor sira sei hamutuk ho diresaun sira sei mai aproxima ita bo’ot sira atu loke fali treinamentu Sols, maibe hakarak hato’o ba PAM atu jere espetativa ami husi ministeriu sei halo iha fatin balu de’it, maibe hakarak atu halo iha Covalima laran tomak ne’e PAM maka bele ba lobi hela SEFOPE ho Edukasaun, keta halo ami mai tiha imi dehan nusa maka Kamanasa de’it iha kursu lian ingles ne’e nusa la loke hotu iha Covalima laran tomak ne’ebe iha biban ne’e ha’u ko’alia kedas ba ita bo’ot sira, ne’ebe programa sei iha, klaru nia intensaun atu eleva liliu konesimentu lingua iha Suai nian liliu ba area sira ne’ebe besik projetu” informa Ministru Petróleu Rekursu no Minerais, Francisco da Costa Monteiro.
Entertantu tuir Ministru Petróleu Rekursu no Minerais, Francisco da Costa Monteiro informa sei halo ho urjentemente harii bairru foun tanba ho planu governu nian sei muda hotu helikoptru sira ne’eba durante ne’e hala’o atividade husi Dili semo ba iha tasi laran sei muda hotu mai Suai.
Jornalista : Julio Salinas
Editor : Chamot Nahac
