Covalima (RCCT) 10-11-23-Governu liu husi Ministeriu Juventude Desportu Arte no Kultura (MJDAK) apoiu orsamentu ho montante dollar Amerikanu rihun neen atus lima ($ 6.500) mai iha Covalima hodi selebra loron nasonal juventude ba dala XXI no komemora Masakre Santa Cruz 1991 ba dala XXXII.
Pontu Fokal Ministeriu Juventude Desportu Arte no Kultura Munisipiu Covalima, Lucia Gomes hatete ho montante osan ne’ebe ministeriu fo apoiiu mai Covalima ne’e sei aloka postu administrativu sira maibe ho montante ne’ebe la hanesan tanba haree tuir kuantidade suku nebe kada postu administarivu iha.
“Husi Ministeriu Juventude Desportu Arte no Kultura apoiu fundus ho montante hamutuk $ 6.500, lui husi orsamentu ida ne’e fahe ba kada postu administrativu depende ninia suku ba Postu Administrativu Zumalai hetan orsamentu ho montante dolar Amerikanu rihun ida ($1.000), maibe ba postu sira seluk ne’e balu hetan osan ho montante atus hitu lima nulu ($ 750), postu Suai hetan orsamentu ho montante dolar Amerikanu rihun ida atus lima ($ 1.500), hodi implementa atividades hahu loron ohin to’o dia 12 Novembru,atividades ohin hahu primeiru maka iha seminariu no mos aban sei iha limpeza jeral lokraik tuku 4 sei halo marsa saudavel no kontinua kalan halo reflesaun no iha dia 12 dader sei misa, depois misa remata sei tau aifunan masakre setembru negro Suai ba padre na’in tolu ho sarani lubuk nia mate” Lucia informa iha Salaun enkontru Eskola Secundaria Jeral Publiku Suai, Sesta.
Prezidente Komisaun Organizador 12 Novembru, Paulos de Araujo, hatete ba selebrasaun masakre 12 Novembru ba tinan ida ne’e iha postu administrativu Suai hetan apoiu orsamentu husi Ministeriu Juventude Desportu Arte no Kultura hamutuk dolar Amerikanu $ 1.500.
“Husi Komisaun oraganizadora ba atividade 12 Novembru hodi komemora ba dala XXXII no selebrasaun ba dala XXI, husi inisiativa juventude postu Suai nian depois forma tiha komisaun halo proposta hatama ba Centru Juventude Covalima, orsamentu ne’ebe ita hetan husi CJC ne’e tuir informasaun katak mai husi rsamentu jeral estadu liu husi MJDAK, agora atividades ne’ebe ami hala’o maka hahu husi dia 10 maka agora halo daudaun seminariu depois iha parte lokraik sei halo atividades diskursu publiku husi nivel eskola secundariu ninian depois ida ne’e hotu tama ba dia 11 ninian ita sei hala’o limpeja jeral remata iha dader parte lokraik kontinua halo marsa saudavel no marsa saudavel remata kontinua kedas kalan reflesaun, no tama ba iha dia 12 Novembru dader misa hotu kontinua tau ai funan iha monumentu masakre setembru negro” Prezidente Komisaun Organizador dehan.
Paulos afirma ho orsamentu ne’ebé iha komisaun hahu hala’o ona atividade siminariu ba estudante nivel ensino baziku no ensinu secundariu iha Covalima, husi orsamentu ne’e komisaun seidauk koloka ba item balu nesesariu basa orsamentu limitadu.
“Orsamentu ne’e tuir ami nia bazed halo proposta ne’e hamutuk orsamentu ho montante $ 1.500, ida ne’e ba ami halo jestaun katak sufsiente karik item balu maka koloka orsamentu sei dauk nesesariu tanba ho orsamentu ida ne’ebe kiik, iha kompetisaun diskursu ita sei fo premiu ba estudante sira ne’ebe hetan primeiru lugar, segundu lugar no terseiru lugar, tuir ami defini ba primeiru lugar hetan orsamentu ho montante $ 75, segundu lugar hetan osan ho montante $ 50 no ba terseiru lugar hetan $ 35” nia dehan
Entertantu komisaun organizador ba komemorasaun 12 Novembru iha postu suai, hahu ona ho atividades semonariu ba estudante nivel ensinu basiku no sekundaria, no iha sabadu dader sei halo limpeza jeral kontinua ho atividade marsa saudavel, kalan halo reflesaun no selebra misa iha loron 12 Novembru, remata kari aifunan iha Monumentu Masakre Setembru Negro Suai.
Jornalista : Julio Salinas
Editor : Chamot Nahac
